“ძალიან დიდი და საგანგაშო მაჩვენებელია”, – ასე აფასებს „ევროპული საქართველოს“ ერთ-ერთი ლიდერი გიგი უგულავა NDI-ის კვლევის იმ ნაწილს, რომლის თანახმადაც, გამოკითხულთა 49 % ფიქრობს, რომ ქვეყანა არასწორი მიმართულებით ვითარდება.
როგორც უგულავამ განაცხადა, ესენი არიან ადამიანები, რომლებსაც არაფრის იმედი აღარ აქვთ, რომ ვითარებაში, რაშიც ვიმყოფებით, შეიძლება რაიმე სასიკეთო მოხდეს.
“ქვეყანაში მიმდინარე პროცესებისადმი მოსახლეობაში უნდობლობა, ნიჰილიზმი, სკეპტიციზმი არის ჩაბუდებული, რაც ნიშნავს, რომ ხელისუფლებას ფაქტობრივად, დაკარგული აქვს ლეგიტიმაცია”, – ასე აფასებს ექსპერტი გია ხუხაშვილი NDI-ის კვლევების შედეგებს.
რაც შეეხება NDI-ის კვლევის იმ ნაწილს, რომლის თანახმად, საპენსიო პროგრამაში ჩართული პირების 57%-ს არ სჯერა, რომ პენსიაზე გასვლის შემდეგ დაგროვილი თანხით სარგებლობას შეძლებს, ხუხაშვილის აცხადებს, რომ „სახელმწიფო ინსტიტუტების მიმართ უნდობლობა, მოსახლეობაში ნიჰილიზმის და სკეპტიკური განწყობების შემდეგ მეორე მთავარი პრობლემაა“.
როგორც მან აღნიშნა, კვლევების მიხედვით გამოჩნდა, რომ მოსახლეობა არსებული ვითარებიდან გამოსავალს ვერ ხედავს, რაც ასევე სამწუხაროა.
“რეალური სურათი იმ კვლევებშია დადებული, რომელიც ხელისუფლებას გააჩნია”, – ამის შესახებ საპარლამენტო უმრავლესობის ლიდერმა გია ვოლსკიმ ჟურნალისტებს განუცხადა, რითაც გამოეხმაურა NDI-ის კვლევის შედეგებს.
მისი განცხადებით, ხელისუფლების მუშაობა ორიენტირებულია მათსავე კვლევის შედეგებზე და არა იმ კვლევაზე, რომელიც მისი თქმით, პოლიტიკურად არის ანგაჟირებული.
“დღეს გამოქვეყნდა NDI-ის კვლევა, რომელიც ფაქტობრივად, აჩვენებს, რომ დასასრულისკენ, დაისისკენ მიდიხართ. მზის ჩასვენება ხდება „ქართული ოცნების“, თუ ზაქარია ფალიაშილის მუსიკით მიდიხართ დასასრულისკენ და სწორედ თქვენ სრულდებით. ეს არის ვერდიქტი თქვენი 7-წლიანი მუშაობისა, რაც NDI-ს კვლევის სახით ვნახეთ. მეორე მხრივ, ეს ასახავს ქვეყანაში არსებულ კატასტროფულ ვითარებას.” – ამის შესახებ ფრაქცია „ნაციონალური მოძრაობის“ თავმჯდომარემ, რომან გოცირიძემ განაცხადა.
“ეს არის ჩვენი მოქალაქეების ყველაზე ადეკვატური შეფასება იმ რეალობაზე, რომელშიც უწევთ მათ ცხოვრება”,- ასე აფასებს “ნაციონალური მოძრაობის“ წევრი სალმე სამადაშვილი NDI-ის კვლევის შედეგებს, რომლის თანახმად, გამოკითხულთა 49 % ფიქრობს, რომ ქვეყანა არასწორი მიმართულებით ვითარდება.
სალომე სამადაშვილის თქმით, კვლევის ამ მაჩვენებელის მიხედვით, საქართველოს მოსახლეობის უმეტესობას მიაჩნია, რომ “ქვეყანა უფსკრულისკენ მიდის”.
“ბოლო წლების განმავლობაში გარკვეული წინსვლაა უმუშევრობის მიმართულებით, მაგრამ არა იმ დონით, რაც დააკმაყოფილებდა იმ ადამიანებს, ვისაც დღეს ყველაზე მეტად უჭირს”, – ამის შესახებ თბილისის მერმა კახა კალაძემ NDI-ის კვლევის შედეგებთან დაკავშირებული კითხვის კომენტირებისას განაცხადა, რომლის თანახმად, გამოკითხულთა 49 % ფიქრობს, რომ ქვეყანა არასწორი მიმართულებით ვითარდება და მათი უმრავლესობისთვის სამუშაო ადგილები კვლავ მთავარ ეროვნულ საკითხად რჩება.
კახა კალაძის თქმით, უმუშევრობის პრობლემასთან მიმართებით კიდევ ბევრია სამუშაო.
NDI-ის კვლევის საველე სამუშაოები 13-დან 29 ივლისამდე პერიოდს მოიცავს. სულ კვლევაში შედის 2132 დასრულებული ინტერვიუ და კვლევის საშუალო ცდომილება არის 1.7%.
კვლევა ჩატარებულია NDI-ს დაკვეთით CRRC -საქართველოს მიერ. NDI ხუთშაბათს კვლევის პოლიტიკური ნაწილის პრეზენტაციას გეგმავს.
