საქართველოს მთავრობის ადმინისტრაციის სტრატეგიული კომუნიკაციების დეპარტამენტის უფროსი ნინო გიორგობიანი “მთავარი არხის” რეპორტაჟს, რომლის თანახმადაც ირაკლი ღარიბაშვილმა კანონდარღვევით მიიღო კოვიდ-ბარათი, სოციალურ ქსელში ეხმაურება:
“დღეს ერთ-ერთმა ტელეკომპანიამ “სკანდალური” ამბავი აცნობა საზოგადოებას და მორიგი ფეიკ ნიუსი გაავრცელა იმის შესახებ, რომ თითქოსდა პრემიერ-მინისტრმა დანაშაული ჩაიდინა და კოვიდბარათი გააყალბა, ამ დანაშაულის ამსახველი მასალა კი მისმა პრესსამსახურმა პირადი კამერით გადაიღო და საჯაროდ გაავრცელა. არადა ძალიან მარტივი იყო იუსტიციის სახლის გვერდზე ინფორმაციის გადამოწმება, სადაც ნათლად წერია, რომ კოვიდბარათის მიღება შეუძლია როგორც სრულად, ისე ერთჯერადად ვაქცინირებულ პირს. ნებისმიერ პირს შეუძლია იუსტიციის სახლებსა და საზოგადოებრივ ცენტრებში აიღოს COVID 19 ბარათი, რომელშიც მოცემულია შემდეგი ინფორმაცია: ვაქცინაციის სტატუსი, ბოლო pcr კვლევის შედეგი, ინფიცირების სტატუსი ბოლო 6 თვე. ბარათი გაიცემა უფასოდ.ამავე ტელეკომპანიამ პრემიერ-მინისტრის ნებართვის გარეშე მისი პირადი მონაცემები უკანონოდ გამოიყენა და ვაქცინაციის პორტალზე თვითნებურად დაარეგისტრირა. ეს სამარცხვინო ქმედებაც, ისევე როგორც გავრცელებული ტყუილი “გაყალბებულ” კოვიდბარათზე, არც ჟურნალისტურ და არც ადამიანურ სტანდარტში არ ჯდება!” – წერს გიორგობიანი.
ცნობისთვის, საქართველოს პრემიერ-მინისტრმა ირაკლი ღარიბაშვილმა და იუსტიციის მინისტრმა რატი ბრეგაძემ ქუთაისის იუსტიციის სახლში კოვიდ-ბარათები აიღეს.
ფაქტს სოციალურ ქსელში “მთავარი არხის” დირექტორი გამოეხმაურა და დაწერა, რომ ირაკლი ღარიბაშვილი ვაქცინის მეორე დოზაზე დაარეგისტრირა.
ირაკლი ღარიბაშვილს კოვიდის გადატანის შემდეგ ვაქცინის ერთი დოზა აქვს გაკეთებული.
