„გილოცავთ, ზუგდიდის ინფექციურ საავადმყოფოში კორონავირუსისგან პირველი გამოჯანმრთელებული პაციენტი გვყავს! მადლობა ექიმებს“ , – წერს სამეგრელო-ზემო სვანეთის სახელმწიფო რწმუნებული ალექსანდრე მოწერელია.
სახელმწიფო რწმუნებულის ადმინისტრაციის ინფორმაციით, რეგიონში პირველი გამოჯანმრთელებული პაციენტი, 67 წლის მამაკაცია, რომელიც საქართველოში თურქეთიდან შემოვიდა. მათივე ინფორმაციით, სწორედ ის იყო პირველი მოქალაქე, ვისაც სამეგრელო-ზემო სვანეთის რეგიონში კორონავირუსი დაუდასტურდა. მან მკურნალობის კურსი ზუგდიდის ინფექციურ საავადმყოფოში გაიარა.
როგორც სამეგრელო-ზემო სვანეთის რწმუნებულის ადმინისტრაციაში აცხადებენ, დღესვე, ლუგარის ცენტრიდან, უარყოფითი პასუხი მოვიდა ზუგდიდის რეფერალურ საავადმყოფოში მყოფი აფხაზეთიდან გადმოყვანილი მოქალაქის ანალიზებზე. კორონავირუსული ინფექციის არსებობა არ დაადასტურა არც ფოთის საავადმყოფოში მოთავსებული 5 მოქალაქის ანალიზის პასუხმა.
რეგიონში ამჟამად კორონავირუსი ერთ მოქალაქეს უფიქსირდება. შუახნის ქალბატონი, რომელიც ოკუპირებული აფხაზეთიდან შემოვიდა, მკურნალობის კურსს ზუგდიდის ინფექციურ საავადმყოფოში გადის. ექიმების განცხადებით, მისი ჯანმრთელობის მდგომარეობა დაკმაყოფილებელია და მკურნალობა გართულებების გარეშე მიმდინარეობს.
