“გადაგვაგდეთ? გადაგაგდებთ ივანიშვილო”, “35 გავრილოვი”- ასე გამოეხმაურნენ პროპორციული სისტემის კანონპროექტის ჩაგდებას ქუთაისში გამართულ საპროტესტო აქციაზე, რომელიც სამოქალაქო აქტივისტებმა, არასამთავრობო ორგანიზაციებმა, მოქალაქეებმა და პოლიტიკური პარტიების წარმომადგენლებმა გამართეს.
აქციაზე, რომელიც მესხიშვილის თეატრის წინ 19:00 საათზე დაიწყო, მონაწილეები აცხადებდნენ რომ ხელისუფლებამ 20 ივნისის მოვლენების შემდეგ ერთადერთი დაპირებაც არ შეასრულა და მოქალაქეები კვალავ მოატყუა. აქციის მონაწილეების თქმით, ამ ტყუილს “ქართულ ოცნებას” არ აპატიებენ.
მოგვიანებით ცენტრალური მოედნიდან საპროტესტო აქციამ მერიასთან გადაინაცვლა. აქციის მონაწილეებმა მაჟორიტარი დეპუტატების ქმედებას სამარცხვინო და „35 გავრილოვი“ უწოდეს. აქციის მონაწილეებმა სიმბოლურად იმ მაჟორიტარი დეპუტატების სახელები და გვარები ამოიკითხეს, რომელთაც კანონპროექტს მხარი არ დაუჭირეს, რის შემდეგაც სია პროტესტის ნიშნად დაწვეს. მათი თქმით, ამ მაჟორიტარმა დეპუტატებმა ადამინებს თვალები მეორედ დათხარეს. აქციის მონაწილეებმა ქუთაისის მაჟორიტარი დეპუტატის დიმიტრი მხეიძის ქმედება დაგმეს და მას “ქუთაისის სირცხვილი” უწოდეს. მხეიძე ერთ-ერთია იმ 37 დეპუტატს შორის, რომელმაც პარლამენტის სხდომაზე, კენჭისყრის წინ რეგისტრაცია გაიარა, მაგრამ თავად კენჭისყრაში მონაწილეობა აღარ მიიღო. სწორედ ამ დეპუტატების ქმედების შედეგად ჩავარდა საკონსტიტუციო ცვლილებების პროექტი პარლამენტში.
შეგახსენებთ, რომ პროპორციულ საარჩევნო სისტემაზე გადასვლასთან დაკავშირებით საკონსტიტუციო ცვლილებები პარლამენტში დღეს ჩავარდა. ცვლილებებს მხარი მხოლოდ 101-მა დეპუტატმა დაუჭირა. 3 წინააღმდეგი წავიდა. მათგან 37-მა დეპუტატმა კი თავი შეიკავა. კანონის მიღებას 113 ხმა სჭირდებოდა. ჩავარდნილი საკონსტიტუციო ცვლილების შემდეგ პარლამენტის თავმჯდომარე არჩილ თალაკვაძემ განაცხადა, რომ 2020 წლის საპარლამენტო არჩევნები ისევ შერეული სისტემით, ბლოკებით და 3%-აინი ბარიერით ჩატარდება.