კრიტიკულ სიტუაციაში რომ პოზიტიურ აზროვნებას დიდი მნიშვნელობა აქვს, ამის შესახებ თითოეული ჩვენთაგანი ინფორმირებულია. გადაცემა “შუადღე ქუთაისში” დაინტერესდა საგანგებო მდგომარეობის გამოცხადებას როგორ და რა გზით შეეგუა ზედმეტად აქტიური და ყველასათვის კარგად ნაცნობი ჟურნალისტი დავით ლიკლიკაძე.
“როგორც ამბობენ ადამიანი ყველაფერს ეგუება, დავიწყე მეც შეგუება. არათუ სახლში დარჩენა, შეიძლება ითქვას, რომ სახლში ნამყოფი არ ვიყავი ბოლო 30 წელი. მთელი 1 კვირა სახლში ვარ პრაქტიკულად, იშვიათად გავდივარ ისიც თუ მაღაზია მჭირდება, და რაღაცა ბავშვთა კვებასთან არის დაკავშირებული , ან თუ შეხვედრა მაქვს ან თუ ინტერვიუს ვიძლევი ისიც ონლაინ. აღარ ვიღვიძებ დილით ისე დაფეთებული საათზე რომ ვიყურებოდი ხოლმე და ვისტრესებოდი ამის გამო, რომელი საათია 8-ის ნახევარია, შემიძლია ვიძინო 20 წუთი, ამ მხრივ ძალიან კომფორტულია, ვიღვიძებ როცა მინდა, მშვიდი ძილი მაქვს, ნელა-ნელა ვსაუზმობ და არა რაღაცა გადარბენაზე. ნელა ვიღებ აბაზანას და რამდენი ხანიც მინდა ვჩერდები. ვიდრე გავიღვიძებ, მოვწესრიგდები და ყავას დავლევ ამასობაში 12 საათი სრულდება. შემდეგ ინტერნეტში შევდივარ , ჩამოვსქროლავ ,ვეცნობი ინფორმაციებს, ამასობაში კი მოვიდა დრო სადილზე ვიფიქრო. ჩართული ვარ სადილის არამხოლოდ მოტანაში, არამედ მომზადების პროცესში. შემდეგ ვიძლები ინტერვიუებს, ან ვეცნობი საქმიან წინადადებებს და ამასობაში ვახშმის დროც მოდის. ვუყურებ ტელევიზორს, ვარ ოჯახში და ასე მგონია ცოლი ახლა მოვიყვანე. ბავშვთან უფრო დავმეგობრდი, ამდენხანს ბავშვი არ მეკარებოდა საერთოდ, ახლა მომეპარება და მაკოცებს, ვენატრები უკვე ჩემთან რჩება. დავიწყე ამ დღეების პოზიტიურად ყურება, იმიტომ რომ სხვა გზა არა მაქვს , უნდა ვისწავლო თანაცხოვრება ამ წესრიგთან , რომელიც დამიყენა მსოფლიო გამოწვევამ. ისიც ვიცი რომ ეს ყველაფერი დიდი ხანი არ გაგრძელდება, დაიხევს უკან ეს ვირუსი და მთელს მსოფლიოში დადგება სიწყნარე, ეს შეეხება ჩვენს ქვეყანასაც და ყველაფერი ძველ რეჟიმში დაბრუნდება.” შეკითხვაზე, გაუჭირდება თუ არა 1 თვის შემდეგ დაუბრუნდეს ცხოვრების ჩვეულ რიტმს- ბატონი დავითი გვპასუხობს :” ყველაფერს შევეგუე რამდენიმე დღეში და ძველ რეჟიმში დაბრუნებას რა უნდა, 15 წუთში დავბრუნდები.”
#დარჩისახლში– გისურვებთ ჯანმრთელობას.
ავტორი: ნანა თევდორაძე
