ცნობილმა მსახიობმა და კალიფორნიის ყოფილმა გუბერნატორნა არნოლდ შვარცენეგერმა CNN-თან მიცემულ ინტერვიუში იმ ადამიანებს უსაყვედურა, რომლებიც ვაქცინაციაზე, პირბადის ტარებასა და სოციალური დისტანციის დაცვაზე უარის თქმას საკუთარი უფლებების დაცვის სახელით ამართლებენ.
“ხალხმა უნდა იცოდეს, რომ ვირუსი აქაა. ის ხალხს კლავს და ამის პრევენციის ერთადერთი საშუალება ვაქცინაცია, პირბადის ტარება, სოციალური დისტანცია, ხელების მუდმივად დაბანაა და არა ‘ჩემი უფლებები ირღვევა’-ს ძახილია.
შევე*ი თქვენს თავისუფლებას იმიტომ, რომ თავისუფლებას თან ვალდებულებები და პასუხისმგებლობა ახლავს”, — განაცხადა მან.
შვარცენეგერმა მწუხარება გამოთქვა იმის გამო, რომ არსებობენ ადამიანები, რომლებიც ექიმებს არ ენდობიან და კორონავირუსის საფრთხეებს არ აღიარებენ.
“ჯერ კიდევ არსებობენ ადამიანები, რომლებიც ამ ყველაფერს უარყოფენ. ჯერ კიდევ არსებობენ ადამიანები, რომელთაც პირბადის ტარების არ სწამთ.
ჯერ კიდევ არსებობენ ადამიანები, რომლებიც ამბობენ: ‘სოციალური დისტანცია და ეს ყველაფერი საჭირო არაა’.
ვფიქრობ, ხალხს ყოველთვის უნდა ვახსენებდეთ, რომ ექსპერტების თქმით, დახურულ სივრცეში პირბადე აუცილებლად უნდა ატარონ”, — ამბობს მსახიობი.
შვარცენეგერმა რეგულაციების უგულებელყოფა შუქნიშნის უგულებელყოფას შეადარა.
“შენ არ გაქვს უფლება, არ გაიკეთო ნიღაბი, რადგან შესაძლოა, ვირუსი სხვა ადამიანს გადასდო, რომელიც შეიძლება ავად გახდეს და მოკვდეს”, — განაცხადა შვარცნეგერმა.
