კარგი იქნება რომ მომისმინონ, მე კარგ რაღაცებს ვლაპარაკობ,- ასე უპასუხა შინაგან საქმეთა მინისტრმა ვახტანგ გომელაურმა ჟურნალისტების კითხვას, რჩება თუ არა განცდა, რომ სახელმწიფო უსაფრთხოების სამსახური მასაც უსმენს.
მოგვიანებით გომელაურმა იმავე კითხვაზე აღნიშნა, რომ არანაირი შეგრძნება არ აქვს იმასთან დაკავშირებით, რომ უსმენენ. მინისტრმა ზოგადად უარყო ფარული მოსმენების შესაძლებლობა და აღნიშნა, რომ მსგავსი დოკუმენტის გაკეთება, რომელიც გუშინ გადაცემა „მთავარ აქცენტებში“ ნიკა გვარამიამ წაიკითხა, მასაც შეუძლია.
„შემიძლია გავაკეთო მილიონობით დოკუმენტი და გამოვდო, ეს არ არის ოფიციალური. ამაზე ვერ გავაკეთებ განცხადებას. დეტალებში ჩასვლა, მე ვთვლი, რომ ზედმეტია ჩემი მხრიდან. იქიდან გამომდინარე, რომ ფურცელი წაიკითხა ნიკა გვარამიამ, ეს ოფიციალურია და ნამდვილია თუ არა მე როგორ უნდა დავადასტურო?
ალბათ, შესაბამისი უწყებები დაინტერესდებიან და გამოიძიებენ თუ გამოსაძიებელი იქნება. არანაირი შეგრძნება არ მაქვს, რომ მისმენენ მე,“- განაცხადა გომელაურმა.
ცნობისთვის, „მთავარი არხის“ ინფორმაციით, სახელმწიფო უსაფრთხოების სამსახური პოლიტიკოსებს, არასამთავრობო ორგანიზაციების წარმომადგენლებსა და ჟურნალისტებს უსმენს.
კერძოდ, გუშინ, გადაცემაში „მთავარი აქცენტები“ ნიკა გვარამიამ წაიკითხა, როგორც თავად აღნიშნა, სუს-დან მოპოვებული კრებსი.
გვარამიას ინფორმაციით, ჩანაწერებში საუბარია სასულიერო პირებზე, ოპოზიციის წარმომადგენლებზე, ჟურნალისტებზე, მთავრობის ადმინისტრაციის მოქმედ და ყოფილ თანამშრომლებსა და მათ პირად ცხოვრებაზე.
