აკაკი წერეთლის სახელმწიფო უნივერსიტეტის ბიზნესის ადმინისტრირების სტუდენტების განცხადება :
ჩვენ, აკაკი წერეთლის სახელმწიფო უნივერსიტეტის ბიზნესის ადმინისტრირების პირველი კურსის სტუდენტები, ღრმა შეშფოთებას გამოვხატავთ ქვეყანაში არსებული კრიზისული ვითარების გამო. არსებული მოვლენები, რომლებიც მიმართულია დემოკრატიული ღირებულებების, სამოქალაქო თავისუფლებებისა და ადამიანის უფლებების შელახვისკენ, განსაკუთრებით მტკივნეულია ჩვენი საზოგადოებისთვის და ეწინააღმდეგება ქვეყნის ევროპული განვითარების მიზნებს. გვჯერა, რომ უნივერსიტეტი, როგორც განათლებისა და პროგრესის ცენტრი, ვალდებულია დაიკავოს მკაფიო და ღირსეული პოზიცია საზოგადოებრივად მნიშვნელოვან საკითხებზე. განათლება არ არის მხოლოდ ცოდნის მიღების პროცესი; იგი უნდა იყოს სივრცე, სადაც ყალიბდება პასუხისმგებლიანი მოქალაქეები, ვითარდება სამოქალაქო ცნობიერება და დამკვიდრდება თავისუფლებისა და სამართლიანობის პრინციპები.
დღეს, საქართველოში მიმდინარე მოვლენები ნათლად აჩვენებს, რომ საჭიროა ყველა ინსტიტუციის, მათ შორის, უნივერსიტეტების აქტიური ჩართვა იმ ღირებულებების დაცვაში, რომლებიც დემოკრატიისა და ადამიანის უფლებების საფუძველს ქმნის. მიგვაჩნია, რომ უნივერსიტეტი ვალდებულია მხარი დაუჭიროს სამართლიან მოთხოვნებს, გამიჯნოს თავი ძალადობრივ ქმედებებს და მხარი დაუჭიროს საქართველოს ევროპულ ინტეგრაციას. ჩვენი ქვეყნის მომავალი პირდაპირ არის დამოკიდებული იმაზე, თუ რამდენად შევძლებთ ერთიანობითა და სოლიდარობით დავიცვათ ის ძირითადი ღირებულებები, რომლებიც ჩვენი საზოგადოების ფუნდამენტს ქმნის. ამდენად, ჩვენ გამოვხატავთ პროტესტს ქვეყანაში მიმდინარე მოვლენების მიმართ და მოვუწოდებთ: უნივერსიტეტის ადმინისტრაციას, დააფიქსიროს მკაფიო პოზიცია მიმდინარე საკითხებზე.
პროფესორ-მასწავლებლებს, ღიად გამოხატონ მხარდაჭერა სამოქალაქო თავისუფლებებისა და სამართლიანობისადმი.
ყველა სტუდენტს, აქტიურად ჩაერთონ იმ პროცესებში, რომლებიც ემსახურება დემოკრატიული ღირებულებების გაძლიერებას.
ჩვენ გვჯერა, რომ უნივერსიტეტი უნდა იყოს მაგალითი საზოგადოებისთვის, ადგილი, სადაც ღირებულებები სიტყვებით კი არა, ქმედებებით მტკიცდება. ჩვენი პროტესტი მიზნად ისახავს არა მხოლოდ კონკრეტული პრობლემების წინააღმდეგობას, არამედ ფართო საზოგადოებრივი პასუხისმგებლობის აღქმას და მის განმტკიცებას.
საქართველოს ევროპული მომავლისთვის, სამართლიანობისთვის და თავისუფლებისთვის!🇬🇪🇪🇺
