ავსტრალიის ხელისუფლებამ ნოვაკ ჯოკოვიჩს ვიზა მეორედ გაუუქმა. შესაბამისი გადაწყვეტილება იმიგრაციის საკითხებში ავსტრალიის მინისტრმა, ალექს ჰოუკმა მიიღო.
„დღეს ჩემი უფლებამოსილება გამოვიყენე და ჯანმრთელობისა და კეთილდღეობის საფუძველზე, გავაუქმე ვიზა, რომელსაც ნოვაკ ჯოკოვიჩი ფლობდა, რადგან ამის გაკეთება საზოგადოების ინტერესებში შედიოდა“, – ნათქვამია მინისტრის განცხადებში.
აღნიშნული გადაწყვეტილების შემდეგ, ნოვაკ ჯოკოვიჩს ავსტრალიიდან დეპორტაცია ემუქრება. გარდა ამისა, მას 3 წლით აეკრძალება ავსტრალიის ვიზის მიღება, თუმცა სერბ ჩოგბურთელს ავსტრალიის ხელისუფლების აღნიშნული გადაწყვეტილების გასაჩივრება შეუძლია.
10 იანვარს, ავსტრალიის სასამართლომ დაადგინა, რომ ნოვაკ ჯოკოვიჩი დაუყოვნებლივ უნდა გათავისუფლდეს საიმიგრაციო პატიმრობიდან და მიიჩნია, რომ მთავრობის გადაწყვეტილება ჩოგბურთელისთვის ვიზის გაუქმების შესახებ არაგონივრული იყო.
მოსამართლემ გააკრიტიკა ნოვაკ ჯოკოვიჩის მელბურნის აეროპორტში რამდენიმე საათის განმავლობაში დაკითხვა და აღნიშნა, რომ როგორც დაკითხვა, ასევე ვიზის გაუქმება არაგონივრული ნაბიჯი იყო.
4 იანვარს, ნოვაკ ჯოკოვიჩმა განაცხადა, რომ Australian Open-ში მონაწილეობას მიიღებს, ვინაიდან სამედიცინო მიზეზით ვაქცინაციისგან გათავისუფლება მიიღო. ნოვაკ ჯოკოვიჩი 16 დეკემბერს კორონავირუსით დაინფიცირდა და ამის საფუძველზე ვაქცინაციისგან გათავისუფლდა. ადვოკატების თქმით, ჯოკოვიჩმა დროებითი ვიზა მიიღო, ხოლო ავსტრალიის ჩოგბურთის ასოციაციამ მას კოვიდინფიცირების საფუძველზე „ვაქცინაციისგან სამედიცინო გათავისუფლება“ მიანიჭა.
