ჯანო ანანიძე ქეცბაიასთან „ანორთოსისში“ საქართველოს ეროვნული საფეხბურთო ნაკრების ნახევარმცველი ჯანო ანანიძე, რომელიც მოსკოვის „სპარტაკში“ 11 წელი თამაშობდა, კვიპროსულ „ანორთოსისში“ თავისუფალი აგენტის სტატუსით გადავიდა, ვინაიდან ბოლო პერიოდში მოსკოვურ კლუბში სიტუაცია მთლად კარგად ვერ მისდიოდა და კონტრაქტი ორმხრივი შეთანხმების საფუძველზე გაწყვიტა.
აღსანიშნავია, რომ კვიპროსული გუნდის მთავარი მწვრთნელი თემურ ქეცბაიაა და აღნიშნულ გუნდში ჯანოს გარდა კიდევ ოთხი ქართველი ფეხბურთელი ასპარეზობს – ნიკა კაჭარავა, გიორგი ლორია, ბუბა დაუშვილი და თორნიკე ოქრიაშვილი. ანანიძემ „ანორთოსისთან“ 5-თვიან კონტრაქტს მოაწერა ხელი და სეზონის ბოლომდე დაეხმარება გუნდს, რომელიც ადგილობრივ ჩემპიონატში პირველ პოზიციაზეა და ჩემპიონობის ძალიან კარგი შანსი აქვს.
