ჩამოვედით სოფლის მეურნეობის ასაყვავებლად, ამათმა ყველაფერი წაიღეს და აღარაფერი დამიტოვეს – ირაკლი ამირანაშვილი დახმარებას ითხოვს. მას ვანის სოფელ შუამთაში იონჯას (ძროხის ბალახის) მოსავალი გაუთიბეს და მოპარეს. როგორც ფერმერი “მეგა ტვ”-ს უყვება მინდვრების ახლოს მოსახლეობა არის, საქონელიც დაჰყვათ და ეს ფაქტი ვინმეს აუცილებლად უნდა დაენახა. მისივე თქმით ტექნიკის გარეშე მოსავლის მოპარვას ვერავინ მოახერხებდა. ირაკლი ამირანაშვილის თქმით ზარალი დიდია და ბანკის ვალებიც გადასახდელი დარჩა. როგორც ფერმერი აცხადებს თვითონ ბაღდათში ცხოვრობს, სოფელი კი ვანში, შუამთაში აქვს, სწორედ იქ მდებარეობს იონჯას მინდორი. ქურდობის ფაქტი და დაახლოებით 10 დღის წინ მოხდა.
”მინდა მოგიყვეთ ერთი ამბავი, რომელიც 2 დამწყებ ფერმერს, ვასილ ჩიხლაძეს და ირაკლი ამირანაშვილს გადაგვხვდა.
2020 წლის გაზაფხულზე ვანის რაიონის სოფელ შუამთაში, იჯარით ავიღეთ, რამდნიმე ჰექტარი მიწის ნაკვეთი, სადაც შინაურ ცხოველთა საკვები კულტურა-იონჯა დავთესეთ. მიუხედავად, ზოგადად ქვეყანაში არსებული მძიმე ეკონომიური მდგომარეობისა, როგორღაც მოვახერხეთ გარკვეული თანხის მობილიზება, გავწიეთ ფინანსური ხარჯები, იმ იმედით, რომ კარგ მოსავალს მივიღებდით. აქვე მინდა აღვნიშნო, რომ ყველა ხარჯი ჩვენი ჯიბიდან გავიღეთ, არცერთი სახელმწიფო პროგრამა არ შეგვეხო სამწუხაროდ, რადგან მიწა იჯარით გვქონდა აღებული, მხოლოდ აგრო კრედიტი, რისი საშუალებითაც შევძელით შეგვეძინა ტრაქტორი ნაკვეთში სამუშაოდ, და სესხის გადახდასაც მიღებული მოსავლის რეალიზებიდან მიღებული თანხით ვაპირებდით.
თუმცა კაცი ბჭობდა და ღმერთი იცინოდაო, ჩვენც ასე დაგვემართა. ყურადღების მისაქცევად, ნაკვეთში დროგამოშვებით ჩავდიოდით, ტერიტორია კარგად დაცული და შემოღობილი გვაქვს ეკლიანი მავთულით. ბოლოს 10 დღის წინ მოვინახულეთ და დავგეგმეთ მოსავლის აღება. გასათიბად ჩასულებს შემზარავი სურათი დაგვხვდა: ნაკვეთი მთლიანად გათიბული, მოსავალი სრულად გატანილი, ეკლიანი მავთული რამდენიმე ადგილზე გახსნილი და რამდენიმე ათეული პირუტყვი, განგებ შედენილი, არხეინად ძოვდა ჩვენს ნაკვეთში.
ქვეყანაში, სადაც სოფლის მეურნეობა, ერთ-ერთ პრიორიტეტულ დარგად მიიჩნევა, სადაც რეალურად იდება ინვესტიციები სოფლის მეურნეობის ფეხზე წამოსაყენებლად, ნამდვილად ვერ წარმოვიდგენდით, თუ მსგავსი ფაქტის წინაშე აღმოვჩნდებოდით.
პოლიცია იმწამსვე ჩავრთეთ საქმეში, დაგვპირდნენ გამოვიძიებთო, თუმცა ჯერ-ჯერობით ხელჩასაჭიდი არაფერია.
ბუნებრივია ათეულობით ჰექტარი იონჯის გათიბვას და მისი ნაკვეთიდან გაზიდვას თვითმხილველი აუცილებლად ეყოლება და ვერც 1 და 2 კაცი მოახერხებდა ამ საქმის შესრულებას, ვერც სხვა რაიონიდან მოვიდოდა ვინმე.
ამიტომ იმედი გვაქვს სამართალი იზეიმებს და ამდენი შრომა და ფინანსები წყალში არ ჩაგვეყრება, ვინაიდან წინ ზამთარია, შემოსავლის არანაირი სხვა წყარო ჩვენ რეალურად არ გაგვაჩნია, ტრაქტორის კრედიტი, სწორედ ამ მოსავლით უნდა გადაგვეხადა მთელი ზამთრის მანძილზე და საგაზაფხულო სამუშაოებიც ამ თანხით გვეწარმოებინა. ახლა კი სრულიად უსახსროდ ვართ დარჩენილები, გაგვქურდეს, საშინელ დღეში ვართ.
იმედს ვიტოვებთ, რომ მომხდარზე ობიექტურ და სწრაფ გამოძიებას მოახდენს შესაბამისი ორგანოები და ეს საქმე რეაგირების გარეშე არ დარჩება. თორემ ამდენი ნაშრომი წყალში ჩაგვეყრება და თუ მსგავსი პრეცენდენტი დაფიქსირდება, ეს სხვა „აგრო კრიმინალებსაც“ წაახალისებს და მომრავლდება ასეთი შემთხვევები, შესაბამისად ჩვენი ქვეყნის სოფლის მეურნეობის განვითარებასა და ამ სფეროში თანხის ინვესტირებას მომავალი არ ექნება და ზოგადად აზრს დაკარგავს ამაზე ფიქრი.” – ამბობს ორაკლი ამირანაშვილი ”მეგა ტვ”-თან საუბრისას.
შსს-ს ინფორმაციით გამოძიება სსკ-ის 177-ე მუხლით მიმდინარეობს, რაც ქურდობას გულისხმობს. დანაშაული ისჯება ჯარიმით ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთიდან სამ წლამდე.
