ყოველი მოქალაქის უსაფრთხოება არის პრიორიტეტული, განსაკუთრებით როდესაც საკითხი ეხება ჯანმრთელობას – ამის შესახებ ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ განაცხადა. მან ქვეყანაში შექმნილ მდგომარეობაზე და საკრებულოს მუშაობის ახალ წესზე ისაუბრა:
”როგორც მოგეხსენებათ, ჯანმრთელობის მსოფლიო ორგანიზაციამ COVID-19 პანდემიად გამოაცხადა. აღნიშნულთან დაკავშირებით მთავრობის ყველა ორგანო, 24 საათის განმავლობაში, საგანგებო მუშაობის რეჟიმზე გადავიდა, საგანგებო რეჟიმზე მუშაობს ქუთაისის მუნიციპალიტეტის საკრებულო და საკრებულოს აპარატი.
ამასთან დაკავშირებით ქუთაისის მუნიციპალიტეტის საკრებულომ გამოსცა ბრძანება ახალი კორონავირუსის შესაძლო გავრცელების აღსაკვეთად და მის წინააღმდეგ ერთიანი ღონისძიებების განხორციელების შესახებ, რაც გულისხმობს საკრებულოს აპარატის დისტანციურ სამუშაო რეჟიმში გადასვლას.
ჩვენთვის ყოველი მოქალაქის უსაფრთხოება არის პრიორიტეტული, განსაკუთრებით როდესაც საკითხი ეხება ჯანმრთელობას, ამასთან ჩვენ მოვუწოდებთ მოქალაქეებს, დაიცვან დაავადებათა კონტროლის ცენტრის მიერ გაცემული რეკომენდაციები, მოქალაქეთა უწყვეტი ინფორმირების მიზნით ჩვენ უზრუნველვყავით საკრებულოს სხდომის დამატებით სოციალური მედიის მეშვეობით ტრანსლირება, ასევე ელექტონული კომუნიკაციის ყველა პლატფორმა, ელექტრონული ფოსტა, საკრებულოს და საკრებულოს წევრების Facebook გვერდები, მუნიციპალიტეტის ვებ გვერდი და სატელეფონო არხები არის აქტიური.
მიუხედავად მუშაობის საგანგებო რეჟიმისა, საკრებულოს რიგგარეშე სხდომის დანიშვნა შესაბამისი რეგლამენტის დაცვით, გამომდინარეობს მნიშვნელოვანი აუცილებლობიდან, რათა ერთი მხრივ, არ შეფერხდეს ქალაქის განვითარებისთვის დაგეგმილი ინფრასტუქრუტული პროექტებისთვის თანხების მოზიდვის პროცესი, და მეორე მხრივ, ხელი შევუწყოთ მოქალაქეთა იმ ინიციატივების მხარდაჭერას, რომელიც მიმართულია ადგილობრივი ინვესტიციის განხორციელების და დამატებითი სამუშაო ადგილების შექმნისკენ.” – განაცხადა ქუთაისის საკრებულოს თავმჯდომარის მოვალეობის შემსრულებელმა ირაკლი შენგელიამ.
