უკვე შერჩეულია 14 ათასამდე ადამიანი იმ კრიტერიუმებით, რაც შედგენილი იყო. ანუ ყველაზე მაღალი რისკის მქონე პირები, რომლებიც კოვიდთან მუშაობენ და მათთან უკვე დაიწყება კომუნიკაცია”, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის დასრულების შემდეგ ბრიფინგზე განაცხადა.
მისივე თქმით, შეიქმნა სპეციალური პორტალი, სადაც იმ ადამიანების მონაცემებია ატვირთული, ვინც პირველ ეტაპზე უნდა აიცრას.
„პირველ ეტაპზე Pfeizer-ის ლიმიტირებული 29 250 დოზა უნდა შემოვიდეს თებერვლის ბოლო დეკადაში და ამის შესახებ კოვაქსთან ყოველდღიური კომუნიკაცია მიმდინარეობს. ამისთვის სახელმწიფო სერიოზულად მოემზადა.
რადგან Pfeizer-ი საჭიროებს 70-80-გრადუსიან ცივ ჯაჭვს, ვაქცინაცია მოხდება მხოლოდ სამ ქალაქში: თბილისში, ქუთაისსა და ბათუმში. ასევე შერჩეულია კლინიკები, რადგან პირველი ეტაპი აცრებისა, მოხდება ჰოსპიტალურ სექტორში. ასევე, ერთი კვირის წინ გამოცხადდა და შექმნილია სპეციალური პორტალი, სადაც უკვე ატვირთულია 75 ათასამდე სამედიცინო მუშაკის მონაცემები, ვინც პირველ ეტაპზე იცრება. ამ 75 ათასიდან პირველი ლიმიტირებული დოზა ჰყოფნის დაახლოებით 14 ათასამდე სამედიცინო მუშაკს.
ამიტომ მოვახდინეთ ამ პრიორიტეტის კიდევ უფრო მეტად პრიორიტეტიზაცია და ეს პროცესი დასრულებულია. უკვე შერჩეულია 14 ათასამდე ადამიანი იმ კრიტერიუმებით, რაც შედგენილი იყო. ანუ ყველაზე მაღალი რისკის მქონე პირები, რომლებიც კოვიდთან მუშაობენ და მათთან უკვე დაიწყება კომუნიკაცია.
ვინაიდან ვაქცინაცია ნებაყოფლობითია, შესაძლოა, ვინმემ უარი თქვას აცრაზე. ვიცით ამ შერჩეული ადამიანების პერსონალური მონაცემები, ვიცით რომელი რეგიონიდან, ქალაქიდან თუ სოფლიდან არიან და ხდება ახლა ამ ბაზების დაწმენდა. ვფიქრობთ, რომ ვაქცინის შემოსვლას შევხვდებით მომზადებული, გვექნება ელექტრონული სიები ყველა ადამიანის, ვინც უნდა აიცრას“, – განაცხადა ამირან გამყრელიძემ.
