მსგავსი ტრაგედიების პოლიტიკური მიზნით გამოყენება არამგონია რომ მათზე კარგად მეტყველებდეს – ამის შესახებ პრემიერის მრჩეველმა სოზარ სუბარმა ბაღდათში ვიზისას განაცხადა.
სოზარ სუბარმა გუშინ ხანძრის შედეგად დაღუპული ქალის ოჯახი მოინახულა და იმერეთის გუბერნატორსა და ბაღდათის მერს შეხვდა.
“უდიდესი ტრაგდეია მოხდა, ოთხი ანგელოზი ბავშვი და დედა დაიღუპა.
მინდოდა გავრკვეულიყავი რეალურად რა მოხდა, ვიცით რომ გამოძიება დაწყებულია და ყველა კითხვას გასცემს პასუხის, მაგრამ მანამდე თანადგომა გამოვუხატეთ ოჯახის წევრებს.
დეტალებზე საუბარი ამ მომენტისთვის იქნება ძალიან ძნელი, სოციალურ დახმარებასთან დაკავშირებით თუ საცხოვრებელთან დაკავშირებით. მერისგან რა ინფორმაციაც მივიღე, მათ მიცემული ჰქონდათ საცხოვრებელი სახლი. ახლა რა მდგომარეობა იყო, რა პირობებში იყვნენ ამას გამოძიება გასცემს პასუხს. მე როგორც მითხრეს ორი დღი წინ გადმოვიდნენ ამ სახლში.” – განაცხადა სოზარ სუბარმა.
რაც შეეხება სოციალური დახმარების შეწყვეტას სოზარ სუბარის თქმით ეს მცდარი ინფორმაცია იყო:
“მე მითხრეს, შეწყეტილი ჰქონდათ ერთი თვით, მაგრამ შემდგომ აღუდგათ და ეს ვერ იქნებოდა მათი ამ სახლში გადმოსვლის მიზეზი. რაც შეეხება სახელმწიფოსკენ ხელის გაშვერას, ოპოზიციის წარმომადგენლების მხრიდან მსგავსი ტრაგედიების პოლიტიკური მიზნით გამოყენება არამგონია რომ მათზე კარგად მეტყველებდეს. ოჯახის წევრებს აქვთ უფლება გამოხატონ პრეტენზია და შეიძლება მათ სიტყვებში იყოს ჭეშმარიტება. მოხდა უდიდესი ტრაგედია და ამ ტრაგედიაში ყველანი უნდა ვიყოთ ერთიანები.” – განაცხადა პრემიერის მრჩეველმა სოზარ სუბარმა.
ბაღდათში, წერეთლის ქუჩაზე 3 თებერვალს გვიან, ღამით მომხდარ ტრაგედიას ორსული დედა, 4 მცირე წლოვანი ბავშვი და ოჯახის ახლობელი ემსხვერპლა.
სახლში, სადაც ტრაგედია მოხდა 8 ადამიანი ცხოვრობდა, გარდაცვლილი ქალის მეუღლე და დედა ხანძრის დროს სახლში არ იმყოფებოდნენ, ამჟამად ისინი ნათესავთან, სოფელ წითელხევში არიან.
