არანაირ ტოტალურ ზარალზე საუბარი არ შეიძლება გვქონდეს და სეტყვის საწინააღმდეგო სისტემის ეფექტურობის ეჭვქვეშ დაყენება ნიშნავს, რომ ვიღაცას მთელი კახეთის დასეტყვა უხარია, – ამის შესახებ კახეთის გუბერნატორმა ირაკლი ქადაგიშვილმა განაცხადა.
მისივე ინფორმაციით, ვენახის ზარალი ძალიან მინიმალურია და სეტყვა ძირითადად ერთწლოვან კულტურებს შეეხო.
„რომ არ იყოს სეტყვის საწინააღმდეგო სისტემა კახეთში, ჩავთვალოთ, რომ მოსავლის 90% საერთოდ არ იქნებოდა. გუშინ 790 კვ/კმ ფართობის მქონე ღრუბლის ფრონტი წამოვიდა, რომელიც უკვე იყო ჩამოყალიბებული როგორც სეტყვის ღრუბელი. დღეს გვაქვს რამდენიმე წერტილი, რომელიც დაისეტყვა, თუმცა გვექნებოდა ტოტალური დასეტყვა. ვენახის ზარალი ძალიან მინიმალურია, ძირითადად ერთწლოვან კულტურებს შეეხო ეს სეტყვა. არანაირ ტოტალურ ზარალზე საუბარი არ შეიძლება გვქონდეს და ამ სისტემის ეფექტურობის ეჭვქვეშ დაყენება ნიშნავს, რომ ვიღაცას მთელი კახეთის დასეტყვა უხარია,“ – აღნიშნა ირაკლი ქადაგიშვილმა.
კახეთის გუბერნატორის განცხადებით, ფერმერებს სახელმწიფო დაზღვევის პროექტით შეუძლიათ სარგებლობა.
„ჩვენ ყველაფერზე სტატისტიკას ვაწარმოებთ და სახელმწიფო ყველა სტიქიასთან დაკავშირებით სპეციალურ პროგრამებს ახორციელებს, მათ შორის დაზღვევის პროექტს, რომელიც სახელმწიფო თანადაფინანსებით კეთდება და ყველა ფერმერი ამის შესახებ ინფორმირებულია. 100%-იანი დაზღვევა ბუნების წინაშე არ არსებობს, ამიტომ ყველამ ვისარგებლოთ იმ სიკეთით, რასაც მთავრობა გვთავაზობს დაზღვევის კუთხით,“ – აღნიშნა ირაკლი ქადაგიშვილმა.
ცნობისთვის, 2 მაისს კახეთის რამდენიმე მუნიციპალიტეტი დაისეტყვა. სეტყვა სიღნაღის მუნიციპალიტეტში რამდენიმე წუთი გაგრძელდა და ძირითადად სოფელი ანაგა დააზარალა.
სეტყვა იყო საგარეჯოს მუნიციპალიტეტშიც ამ დროისთვის ზარალს ითვლიან
