მოსამართლის გადაწყვეტილებით, მიხეილ სააკაშვილის საქმეზე გასვლითი სასამართლო სხდომა კლინიკა “ვივამედში” ჩატარდება. საავადმყოფოში მოსამართლე, ადვოკატი და პროკურორი უკვე მივიდნენ. მიხეილ სააკაშვილის ადვოკატის განცხადებით, ახლა ექსპრეზიდენტის ჯანმრთელობის მდგომარეობა არ იძლეოდა იმის შესაძლებლობას, რომ ეს პროცესი ჩატარებულიყო. საქმე საზღვრის უკანონო კვეთის ეპიზოდს ეხება.
“როცა ის თავად ამბობდა, რომ თავს ვგრძნობ კარგად, მინდა პროცესში მონაწილეობის მიღება, ის არ მოჰყავდათ სასამართლო პროცესზე და ამბობდნენ, რომ არ მოგვყავს იმიტომ, რომ ჯანმრთელობის მდგომარეობა არის ცუდი. ამჟამად სიტუაცია არის შეტრიალებული, როცა სააკაშვილი ამბობს, რომ ცუდად ვარ, სამედიცინო დაწესებულებაც ამბობს, რომ ცუდად არის ეს ადამიანი, მაგრამ სასამართლო ამბობს, რომ არა, მაინც უნდა შეუვარდეთპალატაში და ჩავატაროთ. ეს არის ძალიან მარტივი ინდიკატორი თუ რამდენად უსინდისოა ქართული მართლმსაჯულება დღეს,” – აცხადებს ადვოკატი შოთა თუთბერიოძე.
უფლებადამცველის პოზიციის საპირისპიროს ამტკიცებს საქმის პროკურორი. ლევან ვეფხვაძის განცხადებით, სააკაშვილის ჯანმრთელობის მდგომარეობა იძლევა მისი გამოკითხვის საფუძველს.
“ადვოკატების მხრიდან ჩვენ გვქონდა პოზიცია, რომ მას სურს ჩვენების მიცემა. დღევანდელ სასამართლო პროცესზე კლინიკა “ვივამედიდან” წარმოდგენილი იქნა ექიმის ცნობა, რომლის მიხედვითაც ბრალდებულ მიხეილ სააკაშვილს შეუძლია ჩვენების მიცემა თუ, რა თქმა უნდა, ამის უფლება ექნება. გამომდინარე აქედან ვიშუამდგომლეთ გასვლით სხდომაში მონაწილეობა და დააკმაყოფილა მოსამართლემ. არაერთი პროცესი გადაიდო, სადაც ცნობა იყო წარმოდგენილი, რომ მას არ შეეძლო მონაწილეობის მიღება,” – აცხადებს ლევან ვეფხვაძე.
