აშშ-ში საქართველოს საკითხებზე იმსჯელეს. სენატორებმა ქვეყანაში მიმდინარე პოლიტიკური პროცესები, რუსეთის გავლენა, ოლიგარქიული მმართველობა, სასამართლო სისტემა და სხვა მნიშვნელოვანი საკითხები განიხილეს.
„დღევანდელი განხილვის მიზანია, რომ მოვისმინოთ ამჟამად არსებული ვითარება საქართველოში, რათა უკეთ გავიგოთ, როგორ შეუძლია ამერიკის შეერთებულ შტატებს, მხარი დაუჭიროს არსებული პოლიტიკური ჩიხიდან დემოკრატიულ გამოსავალს. საქართველომ გაიარა გრძელი გზა დროის შედარებით მოკლე პერიოდში, რაზეც, ვფიქრობ, რომ ყველა ვთანხმდებით. ის მუშაობდა დემოკრატიული ინსტიტუტების დანერგვასა და გაძლიერებაზე, გზა ყოველთვის სწორი არ იყო, მაგრამ საერთო ტრაექტორია ნამდვილად პოზიტიური იყო. მე მქონდა პატივი საქართველოში ჩავსულიყავი სენატორ რიშთან ერთად 2012 წელს, რათა დავკვირვებოდი მათ არჩევნებს, როდესაც „ქართული ოცნება“ გახდა მმართველი პარტია. არჩევნები აღსანიშნავი იყო ძალაუფლების მშვიდობიანი გადაცემით, რაც კრიტიკულად მნიშვნელოვანია ნებისმიერი დემოკრატიისთვის და ამ არჩევნების შემდეგ, საქართველოში დემოკრატია ზოგადად გაძლიერდა და გაღრმავდა. საქართველომ, ასევე, გამოხატა მისი სურვილი, რომ შეუერთდეს ევროპულ საზოგადოებას, მან განამტკიცა მისი სურვილი, რომ გახდეს ნატო-ს წევრი, რასაც მე მხარს ვუჭერდი და ვაგრძელებ მხარდაჭერას. და ეს არის სწორედ ის გზა, რომელიც ჩვენ გვსურს ახალი დემოკრატიებისთვის და ამას აქვს ორპარტიული მხარდაჭერა სენატში. მაგრამ, სამწუხაეროდ, ვითარება საქართველოში არის კრიტიკული, რომლის გადაწყვეტაც ან დაუბრუნებს საქართველოს დემოკრატიულ გზას ან გაანადგურებს ქვეყნის მიერ წლების განმავლობაში გაწეულ ძალისხმევას. ეუთო-ს ანგარიშის თანახმად, 2020 წლის საპარლამენტო არჩევნები იყო, ვციტირებ: „ კონკურენტული და ეფექტურად ადმინისტრირებული, მიუხედავად კორონავირუსის პანდემიის გამოწვევებისა“. ის ასევე ხაზს უსვამს საარჩევნო რეფორმის საჭიროებას, რაც ვთხოვე მე საქართველოს მთავრობას, რომ მიზანმიმართულად გაეტარებინა. საკმარისი არ არის ჩაატარო არჩევნები, რომლებიც აკმაყოფილებს ლეგიტიმურობის ზღვარს, დემოკრატიულ არჩევნებს უნდა ჰქონდეს მყარი მექანიზმები, რათა გადაწყვიტოს უთანხმოება, მექანიზმები, რომლებიც მიჩნეულია სამართლიანად დემოკრატიული პროცესის ყველა მონაწილის მიერ“, – განაცხადა სენატორმა ჯინ შაჰინმა.
მისივე თქმით საქართველოში არსებული ვითარებით ერთადერთი მხარე იმარჯვებს და ეს არის რუსეთი, ის სარგებლობს არსებული უწესრიგობითა და ქაოსით და ყოველი დღე, როდესაც ოპოზიციის წევრები არიან საპატიმროში, ეს არის რუსეთის გამარჯვება, ყოველი დღე, როდესაც საქართველოს პარლამენტში ადგილები ცარიელია არის ზიანი საქართველოს მოსახლეობისთვის და გამარჯვება რუსეთისთვის.
”საქართველოში არსებული პოლიტიკური კრიზისი შემაშფოთებელია. ეუთომ საპარლამენტო არჩევნების პირველი ტური შეაფასა, როგორც კონკურენტული, სადაც ფუნდამენტური თავისუფლება დაცული იყო, თუმცა მმართველ პარტიასა და სახელმწიფოს შორის ბუნდოვანმა ზღვარმა, პროცესის ზოგიერთი ასპექტის მიმართ საზოგადოების ნდობა შეამცირა.
სამწუხაროდ, ოპოზიციის უმეტესმა ნაწილმა, პარლამენტს ბოიკოტი გამოუცხადა,“- აღნიშნა ჯორჯ კენტმა.
მან ოპოზიციის ლიდერის, ნიკა მელიას დაპატიმრების შესახებაც ისაუბრა და აღნიშნა, რომ მელიას დაკავებამ კრიზისი კიდევ უფრო დაძაბა.
„ოპოზიციის ლიდერის, მელიას დაკავებამ კრიზისი კიდევ უფრო გააძლიერა. მელიას დაპატიმრება ქართული დემოკრატიისთვის უკანგადადგმული ნაბიჯი იყო“, – აღნიშნა ჯორჯ კენტმა.
მისი თქმით, მმართველმა პარტიამ და ოპოზიციამ სიტუაციის დეესკალაცია ვერ მოახერხეს.
„საქართველო ცდილობს თავი დააღწიოს კორუფციულ მემკვიდრეობას და უბრალოდ ცდილობს თავი დააღწიოს რუსეთის გავლენებს. ძალიან მნიშვნელოვანია, რომ ყველა პარტია -ოპოზიცია და მმართველი პარტია შეთანხმდეს და გაიაზროს, რომ ეს მათ საუკეთესო ინტერესშია, ყველას საუკეთესო ინტერესშია, საქართველოს ინტერესშია, რომ დასრულდეს ეს დაპირისპირება და ქვეყანა დაუბრუნდეს მმართველობის მძიმე შრომას, დემოკრატიულობის მძიმე შრომას. საქართველო ძალიან ბევრი ქვეყნის მაგალითია რეგიონში“, – განაცხადა სენატორმა ჯონსონმა.
„მმართველი პარტიის კონცენტრირება ძალაუფლებაზე, პოლიტიზირებული მართლმსაჯულება და სამოქალაქო საზოგადობაზე ზეწოლა ძირს უთხრის ქართველების ნდობას საკუთარი დემოკრატიის მიმართ“, – განაცხადა აშშ-ის სახელმწიფო მდივნის მოადგილის თანაშემწემ კარა მაკდონალდმა. რაც, მისი თქმით, რუსეთის ინტერესების სასარგებლოდ მუშაობს.
მან ასევე აღნიშნა:
”მე ვფიქრობ, ჩვენ დავინახეთ გამოკითხვის შედეგებით, რაზე ფიქრობენ და ზრუნავენ ქართველები და ეს არის სამუშაო ადგილები, შემოსავალი, უმუშევრობა, კოვიდპანდემია, სიღარიბე, ქვეყანა უნდა დაუბრუნდეს მმართველობის პროცესს და საარჩევნო რეფორმა უნდა განხორციელდეს.
მისივე თქმით, ორივე მხარე უნდა დაჯდეს მოლაპარაკების მაგიდასთან, რათა სწრაფად წავიდნენ წინ ინკლუზიური გზით საარჩევნო რეფორმის გატარებასთან დაკავშირებით.
მაკდონალდმა სასამართლო სისტემაზეც ისაუბრა:
”
„მნიშვნელოვანი, პრიორიტეტული პრობლემები, რომლებიც ვნახეთ სასამართლო სისტემაში არის მაგალითად ის, რომ მოსამართლეების უმაღლეს საბჭოს, რომელიც გავლენას ახდენს სხვა მოსამართლეებზე, დისციპლინარული და დაწინაურების სისტემების გამოყენებით, მას კლანად მოიხსენებენ“, -აღნიშნა კარა მაკდონალდმა.
მისივე თქმით, “პატივსაცემი ლიდერების მიმართ მმართველი პარტიის მნიშვნელოვნად გაუარესებული მოპყრობითა და ეროვნული მედიის მზარდი პოლარიზაციით საქართველოს ზიანი ადგება”.- განაცხადა მაკდონალდნა.
ის, რაც ახლა ხდება, არის ოლიგარქის გავლენის გაზრდა სასამართლო სისტემაზე, მედიაზე და დიდწილად პოლიტიკურ პროცესებზე, – ამის შესახებ სენატორმა ჯიმ რიშმა სენატში, საქართველოს საკითხის განხილვისას განაცხადა.
მისივე განმარტებით, უკანასკნელ წლებში ხედავენ, რომ “საქართველო განიცდის დემოკრატიის უკუსვლას”.
მისივე თქმით, კონფლიქტი საქართველოს ვნებს და კარს უხსნის მხოლოდ რუსეთს.
“პასუხისმგებლობა არსებულ კრიზისზე, რომლის წინაშეც საქართველოა, მოდის რამდენიმეწლიანი გაზრდილი დაძაბულობისა და ჩავარდნილი რეფორმების კულმინაციაზე, რაც მჯერა, რომ ნაწილდება ყველა მხარეზე. პოლიტიკურმა პარტიებმა უნდა გაიაზრონ მათი მოვალეობა ქვეყნის წინაშე და დაძლიონ ეს უთანხმოება. მე მინდა ხაზგასმით აღვნიშნო, რომ მმართველი პარტია “ქართული ოცნება” ატარებს განსაკუთრებულ პასუხისმგებლობას, რათა გამოიყვანოს საქართველო ამ კრიზისიდან, ეს კონფლიქტი მხოლოდ ვნებს ქვეყანას და მის ხალხს და უხსნის კარებს რუსეთს.” – განაცხადა ჯიმ რიშმა.
ბატონმა მელიამ დაარღვია გათავისუფლების პირობები, მოიხსნა ელექტრონული სამაჯური, – ამის შესახებ აშშ-ის სახელმწიფო მდივნის მოადგილის თანაშემწემ ჯორჯ კენტმა აშშ-ის სენატის საგარეო ურთიერთობათა კომიტეტის ევროპისა და რეგიონული უსაფრთხოების საკითხებზე თანამშრომლობის ქვეკომიტეტის სხდომაზე განაცხადა, რითაც უპასუხა სენატორ ჯინ შაჰინის შეკითხვას, სჭირდებოდა თუ არა საქართველოს ხელისუფლებას ოპოზიციის ლიდერის, ნიკა მელიას დაპატიმრება და რამდენად მნიშვნელოვანი იქნება მისი გათავისუფლება იმისთვის, რომ ოპოზიცია მოლაპარაკებების მაგიდას დაუბრუნდეს.
„კანონის უზენაესობას ყველა ქართველმა ლიდერმა პატივი უნდა სცეს. ამიტომ ვფიქრობ, რომ ამ სიტუაციაში უდანაშაულო არავინაა. მაგრამ ყველა ქართველს უნდა ჰქონდეს გამოსავლის პოვნის სურვილი, როგორც მათ გასულ წელს გააკეთეს, როდესაც 8 მარტის შეთანხმებას მიაღწიეს“, – განაცხადა ჯორჯ კენტიმ.
მისივე თქმით რუსეთის აგრესია გრძელდება, ისინი არ ისვრიან და ომი არ არის, მაგრამ ნამდვილად არის დაშინება, ასევე გრძელდება კიბერ თავდასხმები. როგორც კენტიმ აღნიშნა ქართველებს აქვთ ყველა უფლება, ჰქონდეთ პრეტენზია რუსეთის წინააღმდეგ, რადგან რუსეთმა 2009 წლის ომის შემდეგ აღებული ვალდებულებები არ შეასრულა.
აშშ-ის სენატის საგარეო ურთიერთობათა კომიტეტის ევროპისა და რეგიონული უსაფრთხოების საკითხებზე თანამშრომლობის ქვეკომიტეტის სხდომაზე საქართველოს საკითხზე იმსჯელეს.
სხდომას სენატორი ჯინ შაჰინი ხელმძღვანელობდა.
სხდომას ესწრებოდნენ აშშ-ის სახელმწიფო მდივნის მოადგილის თანაშემწეები, ჯორჯ კენტი და კარა მაკდონალდი.
