თბილისის სახელმწიფო უნივერსიტეტი კეკელიძის ქუჩაზე მდებარე ბინიდან ოჯახის გამოსახლებისას დაკავებული თსუ-ს მოწვეული ლექტორის, აკაკი ჩიქობავას საქმეს გამოეხმაურა.
თსუ-ს განცხადებით, უნივერსიტეტი უსაფრთხო გარემოს ქმნის როგორც სტუდენტებისთვის, ასევე პროფესორ-მასწავლებლებისა და ადმინისტრაციის თანამშრომლებისთვის.
“თბილისის სახელმწიფო უნივერსიტეტი დაინტერესებულია თსუ-ის მოწვეული ლექტორის, აკაკი ჩიქობავას, საკითხით. აკაკი ჩიქობავას ადვოკატისა და ოჯახის მომართვის შემთხვევაში უნივერსიტეტის პროფესორები მზად არიან თხოვნით მიმართონ შესაბამის უწყებებს და თავდებში დაუდგნენ მას”. – წერია განცხადებაში.
როგორც უნივერსიტეტის გავრცელებულ ინფორმაციაში აღნიშნული, ისინი მიუღებლად მიიჩნევენ დესტრუქციულ ქმედებებსა და ულტიმატუმის ენით საუბარს.
“ამასთან, უნივერსიტეტისთვის მიუღებელია ულტიმატუმის ენით საუბარი, დესტრუქციული ქმედებები, რომლებიც ზიანს აყენებს უნივერსიტეტის ავტორიტეტს, ხელს უშლის სასწავლო პროცესს და, ზოგადად, საუნივერსიტეტო ცხოვრებას.
მიგვაჩნია, რომ დიალოგი მხოლოდ იმ შემთხვევაშია შესაძლებელი, თუ ის საუნივერსიტეტო ეთიკის ფარგლებში დაბრუნდება”. – ნათქვამია თსუ-ს განცხადებაში.
