The Insider-ის ჟურნალისტური გამოძიების მიხედვით რუსული საინფორმაციო სააგენტო Sputnik მოლდოვას ხელმძღვანელი, ვიტალი დენისოვი, რომელიც მოლდოვიდან გააძევეს, სავარაუდოდ, რუსული არმიის ოფიცერია.
“დენისოვს ძალიან ირიბი ურთიერთობა აქვს ჟურნალისტიკასთან და, სავარაუდოდ, არის სპეციალური სამსახურის 72-ე ცენტრის (სამხედრო ნაწილი N54777) ოფიცერი, რომელიც, რუსეთის თავდაცვის სამინისტროს მთავარი სადაზვერვო სამმართველოს (ГРУ) ინტერესების ფარგლებში, ეწევა უცხოური აუდიტორიის დეზინფორმაციას,” – წერს The Insider.
გამოძიების მიხედვით, დენისოვი იმდროინდელი უკრაინის სსრ-ის ამიერკარპატების რეგიონში დაიბადა და სკოლის დამთავრების შემდეგ ჩაირიცხა ლვოვის უმაღლეს სამხედრო-პოლიტიკურ სკოლაში. შემდეგ ის მოსკოვში, თავდაცვის სამინისტროს მთავარი ბეჭდვითი ორგანოს, გაზეთ “კრასნაია ზვეზდას,” თანამშრომელი იყო. 2013 წელს კი მოსკოვის ოლქის მთავარ საგამოძიებო სამმართველოში მუშაობდა.
როგორც The Insider თავდაცვის სამინისტროს წყაროზე დაყრდნობით წერს, დენისოვი საგამოძიებო სამმართველოდან გადავიდა სპეციალური სამსახურის 72-ე ცენტრში, რომელიც, სავარაუდოდ, დაკავებულია უცხოური აუდიტორიისათვის ყალბი ინფორმაციის გავრცელებით. სტატიაში საუბარია იმაზეც, რომ 2016 წელს დენისოვს პოლკოვნიკის წოდება მიენიჭა. 2019 წლიდან ის ხელმძღვანელობდა Sputnik-ს ე.წ. სამხრეთ ოსეთში, შემდეგ აზერბაიჯანში, 2022 წლიდან კი მოლდოვაში.
შეგახსენებთ, რომ Sputnik მოლდოვას ხელმძღვანელი 13 სექტემბერს დაადეპორტეს,მას ქვეყანაში შესვლა 10 წლით აეკრძალა.
როგორც მაშინ დენისოვმა რუსულ სამთავრობო მედია РИА Новости-ს განუცხადა, კიშინოვში, მის ბინაში, მიგრაციის სამსახურის წარმომადგენლები მივიდნენ და პირველივე რეისით დეპორტაციის შესახებ ბრძანების საფუძველზე აეროპორტში წაიყვანეს.
