დათბობასთან ერთად კორონავირუსი გაქრება თუ არა, მეცნიერების აზრი აქ ორადაა გაყოფილი, – ამის შესახებ ინფექციური საავადმყოფოს დირექტორმა, თენგიზ ცერცვაძემ „პირველი არხის“ ეთერში განაცხადა.
„მეცნიერების ერთი ნაწილი ვარაუდობს, რომ თუ სხვა რესპირატორული ვირუსები დათბობის შემდგომ მიდის კლებისკენ, ნახევარი მსოფლიო ფიქრობს, რომ კორონავირუსიც ასე მოიქცევა, რადგან ისიც რესპირატორული ვირუსია, ხოლო მეორე ნახევარი ფიქრობს, რომ ვინაიდან კორონავირუსი გენეტიკურად აბსოლუტურად განსხვავებულია გრიპის ვირუსისგან ამიტომ ვარაუდობენ, რომ ის არ იქნება სეზონური და დათბობის პერიოდი მასზე არ იმოქმედებს“, – აღნიშნა ცერცვაძემ.
საქართველოში კორონავირუსი 408 ადამიანს დაუდასტურდა, აქედან 95 უკვე გამოჯანმრთელდა, 4 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.
