დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, კორონავირუსით ინფიცირებული 4 პაციენტიდან სამის ჯანმრთელობის მდგომარეობა კლინიკურად დამაკმაყოფილებელია. როგორც მან ჟურნალისტებს განუცხადა, მეოთხე შემთხვევა წინა სამ შემთხვევასთან შედარებით, კლინიკურად უფრო საყურადღებოა, რის გამოც შესაბამისი კლინიკური კვლევები და დაკვირვება მიმდინარეობს.
„ბოლო შემთხვევა ასევე თავისი მოგზაურობის ისტორიით დაკავშირებულია იტალიასთან, არის საქართველოს მოქალაქე, რომელიც საქართველოში კვირას შემოვიდა, სიმპტომების გარეშე, შემდგომ განუვითარდა მაღალი ტემპერატურა და მაღალი ტემპერატურის გამო, მან თავად მიმართა ინფექციურ საავადმყოფოს, გუშინ დილით მოხდა მისი ჰოსპიტალიზაცია. ჩატარდა კლინიკური კვლევები და გუშინ გვიან ღამით დადებითი შემთხვევა ლაბორატორიულად დადასტურდა. რომ დავრწმუნებულიყავით, გვიან რამდენჯერმე გავიმეორეთ ტესტი და ყველა გამეორებისას პოზიტიური შედეგი აღინიშნა, რის გამოც გუშინვე პასუხი ინფექციურ საავადმყოფოს გადაეგზავნა. ზოგადად, დღეს ოთხი დადებითი შემთხვევაა საქართველოში დაფიქსირებული. ოთხივე მოთავსებულია ცენტრალური ინფექციური სავადმყოფოს ბოქსირებულ განყოფილებაში. ორ პაციენტთან დაკავშირებით გვაქვს ირანში მოგზაურობის ისტორია, ხოლო ორ შემთხვევაში – იტალიაში. ამ 4 პაციენტიდან 3 პაციენტის მდგომარეობა კლინიკურად დამაკმაყოფილებელია. კლინიცისტების ინფორმაციით, დაავადების პროგრესირება არ აღინიშნება. რაც შეეხება მეოთხე შემთხვევას, ის წინა სამ შემთხვევასთან შედარებით, კლინიკურად უფრო საყურადღებოა. მიმდინარეობს შესაბამისი კლინიკური კვლევები, მკურნალობა და ავადმყოფზე დაკვირვება“,-განაცხადა გამყრელიძემ.
