იმერეთის რეგიონის მასშტაბით არსებულ სამ საკარანტინო ზონაში ამ დროისათვის 201 ადამიანია მოთავსებული. მოქალაქეები დაემატა საჩხერისა და წყალტუბოს საკარანტინო ზონებს.
დაავადებათა კონტროლის ეროვნული ცენტრის იმერეთის სამმართველოს უფროსის, გოჩა გიორგიძის თქმით, თითოეული მათგანის ჯანმრთელობის მდგომარეობა დამაკმაყოფილებელია. ასევე, დადებითი დინამიკით მიმდინარეობს საჩხერის საავადმყოფოში კორონავირუსის დიაგნოზით მოთავსებული სამი პაციენტის გამოჯანმრთელების პროცესი.
დაავადებათა კონტროლის ეროვნულ ცენტრში იმ მოქალაქეებს მიმართავენ, რომლებიც თვითიზოლაციაში იმყოფებიან და სთხოვენ, ნუ დაარღვევენ იზოლაციის წესებს, რათა არ გართულდეს ახალ ვირუსთან ბრძოლა.
დღეს ცნობილი გახდა, რომ საქართველოში კორონავირუსი კიდევ ერთ ადამიანს დაუდასტურდა. ინფექციური კლინიკიდან უკვე გაეწერა კორონავირუსით პირველი ინფიცირებული, რომელიც უკვე სრულად განიკურნა. ის ორი კვირის განმავლობაში თვითიზოლაციაში იქნება.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.
Imedinews.ge
