პაციენტი [მიხეილ სააკაშვილი] გვიცხადებს სრულ ნდობას, უკმაყოფილებას არ გამოთქვამს ჩვენს არც მკურნალობის ტაქტიკაზე და არც ჩვენი კვლევების ტაქტიკაზე , – ამის შესახებ სამედიცინო ცენტრ „ვივამედის“ გენერალურმა დირექტორმა ნინო ნადირაძე – კუზანოვამ ჟურნალისტებს განუცხადა, როდესაც ისაუბრა მესამე პრეზიდენტის, მიხეილ სააკაშვილის ჯანმრთელობის მდგომარეობაზე.
ნინო ნადირაძის თქმით, მიხეილ სააკაშვილი მკურნალობას კვლავ თერაპიულ განყოფილებაში განაგრძობს.
„გაუარესებული ნამდვილად არ არის. თვითონ პაციენტთან მაქვს შეთანხმებული, ყოველთვის ნებისმიერი კვლევა, რასაც ვუპირებთ ბატონ მიხეილს [სააკაშვილი], რა თქმა უნდა, ამაზე შეტყობინება მისდის, პირადი ექიმიც ეუბნება, მეც ვაფრთხილებ. ის გვაძლევს ნებართვას და მხოლოდ ამის შემდეგ ხდება კვლევის ჩატარება.
მისი ნებართვის გარეშე არაფერი ხდება. პირად საუბრებშიც და ისედაც გვიცხადებს სრულ ნდობას და მწყინს ხოლმე,როდესაც თქვენგან სულ სხვა შეფასებები მესმის. თვითონ ბატონი მიხეილის სურვილით თავს ვიკავებთ, რომ ასე სწრაფად, ფორსირებულად არ მოხდეს ყველა კვლევის ჩატარება. ბატონი მიხეილი თერაპიულ განყოფილებაში კვლავ დაკვირვების ქვეშ აგრძელებს ყოფნას. დღესაც მოწვეული გვყავდა სპეციალისტები, ფსიქიატრთა ჯგუფი, გაუკეთდა სხვა ინსტრუმენტული კვლევები, გუშინ სრული კომპიუტერული ტომოგრაფია ჩაუტარდა“,- განაცხადა ნინო ნადირაძემ.
მისი განმარტებით, კლინიკას მიმართეს სახალხო დამცველის აპარატიდან, რომლებმაც წარადგინეს მიხეილ სააკაშვილის დასტური იმის შესახებ, რომ თანახმაა კლინიკამ მისი ჯანმრთელობის მდგომარეობაზე მონაცემები გასცეს.
„გადავუგზავნეთ ყველა ჩამონათვალი, რაც მოგვთხოვეს, ის, რაც გუშინდელი დღის ჩათვლით იყო გაკეთებული. შემდგომში, როდესაც მოგვმართავენ ასევე დარჩენილი კვლევების პასუხებსაც მათ გადავცემთ. მე პასუხს ვაგებ ჩემს კლინიკაზე, პაციენტი გვიცხადებს სრულ ნდობას,პაციენტი უკმაყოფილებას არ გამოთქვამს ჩვენს არც მკურნალობის ტაქტიკაზე და არც ჩვენი კვლევების ტაქტიკაზე“, – აცხადებს ნადირაძე.
მან უპასუხა შეკითხვას, რომლის თანახმადაც ვრცელდება ინფორმაცია, რომ მიხეილ სააკაშვილს პარასკევს კვლავ ციხეში დააბრუნებენ.
„მე მინდა, რომ ყველა პაციენტი კარგად იყოს და ამისთვის ჩვენ ყველაფერს ვაკეთებთ. ვინ, რას, სად აპირებს, არ ვიცი“, – განაცხადა ნინო ნადირაძემ.
