ცირა და მამუკა ნაჭყებიები, როცა ცირას ჯანმრთელობის გაუარესების გამო ესპანეთში წავიდნენ ბავშვები სამტრედიაში ბებიასთან დატოვეს, ოჯახის მძიმე სოციალური ყოფა “სიკეთის ქალაქმა” გაავრცელა. 8 წლის გიორგი ამბობდა, რომ ოღონდ კარგად იყოს და მშიერი დაძინებასაც ვისწავლიო.
დღეს გიორგიმ უკვე იცის, რომ დედა ცოცხალი აღარ არის. 34 წლის ახალგაზრდა ქალი რომელიც ესპანეთში ონკოლოგიური სენის დასამარცხებლად ჩავიდა კორონავირუსმა იმსხვერპლა. ბავშვები ახლა . ესპანეთიდან მამის ჩამოსვლას ელოდებიან. ის კი ამ დრომდე ესპანეთში კარანტინშია. ცირა ესპანეთში აკლდამაში დაკრძალეს. ოჯახს საქართველოს საელჩო ვითარების დალაგების შემდეგ გადმოსვენებაში დახმარებას დაპირდა.
“კარანტინში ვარ და ვრჩები მითითებების ქვეშ. ზოგადად ქვეყანა კარანტინის რეჟიმშია. სიტყვებით ვერ გადმოგცემთ ჩემს მდგომარეობას. საელჩოს დახმარებით მივაღწიე იმას, რომ ცხედრის კრემაცია არ მოხდება. ამ სიტყვის გაგონებაც არ მინდა, მანადგურებს. ხელისუფლება დამპირდა, რომ დამეხმარება მერე ცხედრის გადმოსვენებაში, ამის იმედი მაქვს. ახლა სხვა გზა აღარ დამრჩა და ხელი მოვაწერე დოკუმენტს და აქ აკლდამაში დაასვენებენ. თქვენ არ იცით რა ჯოჯოხეთი გამოვიარე ეს დღეები. დაკრძალვაზე მისვლის საშუალება არ არის. ძალიან გამიჭირდება მის გარეშე.”-ამბობს მამუკა ნაჭყებია.
,, ჩვენ დავმარცხდით… პირველივე რეისზე ჩამოვალ საქართველოში, საელჩო შემპირდა პირველივე სპეცრეისით გაგიშვებთ, ბილეთსაც გიყიდითო, მადლობის მეტი რა მეთქმის. ვარაუდობენ, რომ 10 აპრილამდე შესრულდება ეს რეისი, ვიცი საქართველოში კიდევ ორი კვირა მომიწევს კარანტინში ყოფნა, მაგრამ არაფერს დავეძებ, ოღონდ ჩემს შვილებთან მივიდე. შვილებთან დედის გარეშე მიწევს ჩამოსვლა და ეს გულს მიგლეჯავს, მაგრამ აუცილებლად ჩამოვალ… ძალიან იმედიანად მოვდიოდით, ხალხის დახმარებით მოგროვდა თანხა და წამოვედით. თითქოს ყველაფერი კარგად იყო, გამიჩნდა იმედი და რა ვიცი, უცებ ცა ჩამოიქცა ჩვენთვის. ბრძოლა წავაგეთ, დამარცხებული უცხო მიწაზე, მარტო დავრჩი ბრძოლის ველზე, ერთ ოთახში ჩაკეტილი და განადგურებული. 17 წელი ვიცხოვრეთ ერთად. საოცარი ადამიანი იყო. არ იცოდა საერთოდ საუბარი პრობლემებზე, არ შეგაწუხებდა, რომ ტკიოდა, მაშინაც არ შეგაწუხებდა, სულ სხვა ბუნების იყო….
მადლობა ყველას, ვინც ჩვენი ოჯახის გასაჭირი გულთან მიიტანა. მადლობა თითოეულ ადამაიანს”,-
ახლა 5 შვილი მამის ჩამოსვლას ელოდება, მან ესპანეთში დარჩენას შვილებთან დაბრუნება არჩია. ქართველებმა კი, რომლებმაც ჭირშიც და ლხინშიც გვერდით დგომა იციან, გიორგისა და მის დედმამიშვილებს ღირსეულად ცხოვრების საშუალება უნდა მისცენ. თუ ვინმეს შეგიძლიათ უდედოდ დარჩენილი პატარების დახმარება, ამ ანგარიშზე თანხა ჩაურიცხოთ:
GE14TB7922845064300014
მიმღები თამარ ნაჭყებია – 597 45 14 11
მიმღები თამარ ნაჭყებია – 597 45 14 11
მომზადდა ,,კვირის პალიტრის” მიხედვით
