ქუთაისის ოპერის თეატრი რამდენიმე თვიანი პაუზის შემდეგ დღეს, 8 აპრილს გაიხსნება და მაყურებელს „სოფლის ღირსებას წარუდგენს.
“8 აპრილი – დღე, როდესაც ქუთაისის მელიტონ ბალანჩივაძის სახელობის ოპერისა და ბალეტის პროფესიული სახელმწიფო თეატრი (სამხატვრო ხელმძღვანელი – ირინე ლომინაძე) კვლავ უმასპინძლებს თავის ერთგულ მსმენელს, რომელთან განშორება კორონავირუსის პანდემიამ გამოიწვია ჯერ კიდევ 2020 წელს. თუმცა, შეგახსენებთ, რომ 52-ე სეზონის გახსნა ერთგანყოფილებიანი კონცერტით მაინც მოახერხა თეატრმა გასული წლის 14 ოქტომბერს ლადო მესხიშვილის თეატრის ეზოში, ღია ცის ქვეშ ე.წ. „მწვანე თეატრში“.
კორონავირუსის პანდემიის გამო შექმნილი ვითარებისა და დაწესებული რეგულაციების შესაბამისი შემზღუდავი ნორმების სრული დაცვით, ამჯერად უკვე თეატრის სცენაზე შედგება პიეტრო მასკანის შედევრის, ერთმოქმედებიანი ოპერის „სოფლის ღირსების“ წარმოდგენა.” – ნათქვამია ოპერის თეატრის განცხადებაში.
“სოფლის ღირსების” დამდგმელი დირიჟორი რევაზ ჯავახიშვილი, დამდგმელი რეჟისორი მაია გაჩეჩილაძე, დამდგმელი მხატვარი თემურ არსენიძე, მხატვარ-შემსრულებელი ირაკლი სვანიძე. “სოფლის ღირსების” შესრულებაში მონაწილეობას მიიღებენ თეატრის სოლისტები – ფერიდე ჯინჯიხაძე (სანტუცა), ბადრი ადამია (ტურიდუ), ინგა ფუტკარაძე (ლუჩია), ბაკურ კვირიკაშვილი (ალფიო), ირმა შავგულიძე (ლოლა), თეატრის გუნდი (მთავარი ქორმაისტერი – ნათია გოგუაძე) და ორკესტრი. სპექტაკლს წარუძღვება თეატრის მთავარი დირიჟორი – რევაზ ჯავახიშვილი.
ოპერა 8 აპრილს 17:00 საათზე დაიწყება.
