“ნაციონალური მოძრაობის” წევრმა, ეკა ხერხეულიძემ გლდანის მე-18 დაწესებულების დატოვების შემდეგ ექიმ-რეანიმატოლოგს, გულიკო ქილიფთარს მადლობა გადაუხადა და თქვა, რომ მან კრიტიკულად მნიშვნელოვანი როლი ითამაშა მიხეილ სააკაშვილის ჯანმრთელობის მდგომარეობის მართვაში, როდესაც მან გონება დაკარგა.
როგორც ხერხეულიძემ აღნიშნა, მიხეილ სააკაშვილმა ექიმის მიმართ მადლიერება გამოხატა.
ეკა ხერხეულიძემ განმარტება ქილიფთარის გუშინდელ კომენტარზეც გააკეთა, როდესაც მან თქვა, რომ დაწესებულებაში შემთხვევით აღმოჩნდა.
“გულიკო ქილიფთარის ძალიან მადლობელი გახლავთ მიხეილ სააკაშვილი, კონკრეტულად ამ ადამიანმა შეძლო მისი მდგომარეობის მართვა კრიტიკულ ვითარებაში და რომ არ ყოფილიყო ეს ადამიანი, ჩვენ არ ვიცით როგორ განვითარდებოდა მოვლენები.
დღეს რომ მიხეილ სააკაშვილი ცოცხალია, დიდი წვლილი ამ ქალბატონს მიუძღვის.
ალბათ არასწორად გამოყენებულმა სიტყვამ “შემთხვევით აღმოვჩნდი” კითხვები წარმოშვა. ექიმი გულისხმობდა იმას, რომ მას არაფერი არ ესაქმებოდა აქ, უბრალოდ პირადი ექიმის, ნიკა ყიფშიძის თხოვნით იმყოფებოდა. ამის შესახებ მან ვერ მოასწრო ეთქვა და ამან განაპირობა ორაზროვნება. ბატონი მიხეილ სააკაშვილის ოჯახიც და ჩვენც ყველანი, მადლობელი ვართ იმისთვის, რომ ეს ადამიანი ცოცხალია. მადლობას ვუხდით ასევე ქალბატონ გულიკოსაც”- თქვა ეკა ხერხეულიძემ.
