31 ოქტომბერს ლილოს ბაზრობის ტერიტორიაზე, 30 წლის დავით ზურაბაშვილმა ყოფილ ცოლს 11 ჭრილობა მიაყენა. დაჭრილ ქალს კლინიკაში ოპერაცია ჩაუტარდა და მისი მდგომარეობა ამ დრომდე მძიმეა.
ambbei.ge-ს შსს-ს უთხრეს, რომ მომხდარ ფაქტზე გამოძიება, 19-109-ე (დამამძიმებელ გარემოებაში განზრახ მკვლელობის მცდელობა) და 151-ე პრიმა (ადევნება, უკანონო თვალთვალი) მუხლებით დაიწყო.
დავით ზურაბაშვილი ამ დრომდე დაკავებული არ არის.
მომხდარზე გვესაუბრება დაზარალებული ქალის და:
“ჩემს დას 11 ჭრილობა აქვს მიყენებული, ფილტვი ჰქონდა დახეული, ჯერჯერობით მძიმედაა, მაგრამ მდგომარეობა ნელა-ნელა სტაბილურდება. არ ვასაჯაროებთ ინფორმაციას, არც კლინიკის მისამართს, გვეშინია, ჩემს დას ისევ თავს არ დაესხას. როდემდე უნდა ვიყოთ ასე? ეს პირველი შემთხვევა არაა, ადრეც ძალადობდა დათო ჩემს დაზე, თუმცა არ დაუჭრია. ერთად როცა იყვნენ და განქორწინების შემდეგაც ძალადობდა, ემუქრებოდა მუდმივად… მოძალადეა, ძირითადად ეჭვიანობა იყო მიზეზი. ერთად 3 წელი იცხოვრეს, ჩემი და 28 წლისაა, დათო კი 30-ის. ჩემს დაზე ფიზიკური ძალადობისთვის დააპატიმრეს, დას თავს დაესხა, კბილები ჩაუმტვრია და ტუჩი დაუზიანა. ამის გამო 4 წლამდე ჰქონდა მისჯილი, თუმცა წელიწად ნახევარში გაათავისუფლეს, ვადაზე ადრე და ელექტროსამაჯურით დადიოდა. მას მერე დასდევდა. ჩემი და ლილოში, დრაივის ჯიხურში მუშაობდა, 31 ოქტომბერს, საღამოს 10-ის ნახევარზე დაესხა თავს. გაცილებულები იყვნენ და რატომღა უნდა ეეჭვიანა, რას დასდევდა? დაძაბულები ვართ ყოველ დღე, ვცდილობთ ახლა მაინც დავიცვათ ჩემი და, თუ გაიგო სად არის, ისევ დაესხმება თავს…”
