ძველეგვიპტურ არქეოლოგიურ ძეგლ ტაპოსირის-მაგნაზე არქეოლოგებმა აღმოაჩინეს 2000 წლის წინანდელი მუმია, რომელსაც ოქროს ენა აქვს. ინფორმაციას dailymail-ი ავრცელებს.
ეგვიპტის სიძველეთა სამინისტროს ინფორმაციით, მებალზამეებმა ოქროს ენა გარდაცვლილს სავარაუდოდ იმიტომ ჩააყოლეს, რომ მას სიკვდილის შემდეგ „სიცოცხლეში“ ლაპარაკი შესძლებოდა.
მაგალითად, თუ ოქროსენიანი მუმია სიკვდილის შემდეგ მიწისქვეშეთის ღმერთ ოსირისს შეხვდებოდა, ლაპარაკი დასჭირდებოდა.
უცნობია ჰქონდა თუ არა ამ ადამიანს სიცოცხლეში ლაპარაკის პრობლემა; ასევე უცნობია, რატომ დაამზადეს ენა ოქროსგან.
არქეოლოგებმა, რომელსაც კატლინ მარტინესი ხელმძღვანელობს დომინიკელთა რესპუბლიკიდან, მუმია ტაპოსირის-მაგნას 16 სამარხიდან ერთ-ერთში აღმოაჩინეს. ამ ძეგლზე იყო ოსირისისა და ისიდას ტაძრებიც; ქალღმერთი ისიდა ოსირისის და და ცოლი იყო.
ასევე აღმოჩენილია ქალის მუმია რომელსაც აქვს ნიღაბი, რაც სხეულის დიდ ნაწილს ფარავს, ახურავს თავსაბურავი და იღიმის.
ორი მუმია გრაგნილების ნაშთებთან ერთად აღმოაჩინეს, რომელთა ანალიზს და გაშიფვრას მკვლევრები ახლა ცდილობენ. ერთ-ერთი მუმიის შესაფუთ მასალაზე დატანებულია ოსირისის ოქროს დეკორაციები.
მკვლევრებმა ასევე აღმოაჩინეს რამდენიმე ქანდაკება, რომლებიც სამარხში დაკრძალულ ხალხს ასახავს; ქანდაკებები იმდენად კარგად არის შემონახული, რომ დღემდე შეიმჩნევა ინდივიდუალური ვარცხნილობები და თავსაბურავები. სახეები ოფიციალურია, სახეზე ღიმილის გარეშე.
