2020 წლის 1-ელ დეკემბერს, თბილისში, კლდიაშვილის ქუჩაზე არასრულწლოვანი კ.ჩ. ცეცხლსასროლი იარაღით დაჭრეს. ის საავადმყოფოში გადაიყვანეს და საბედნიეროდ, გადარჩა. გაირკვა, რომ არასრულწლოვანს მუხლები ჰქონდა დაცხრილული.
„პრაიმტაიმისთვის“ ცნობილი გახდა, რომ საქმეში ცნობილი „კანონიერი ქურდის“, დავით ქარსელაძის, იგივე „კალატოზას“ ძმისშვილი, გიორგი ქარსელაძე ფიგურირებს, რომელიც შემთხვევის ადგილზე თავდამსხმელთან ერთად იმყოფებოდა და მასთან ერთადვე მიიმალა.
36 წლის გიორგი ქარსელაძე ამჟამად წინასწარ პატიმრობაში იმყოფება. გამოძიება მას, მძიმე დანაშაულის შეუტყობინებლობას ედავება. „პრაიმტაიმმა“ გაარკვია, რომ წარსულში გიორგი ქარსელაძე დაახლოებით 8-ჯერ არის გასამართლებული, მათ შორის განზარხ მკვლელობის მცდელობის ბრალდებით. საუბარია 2018 წლის 13 ივლისს, კოტე აფხაზის ქუჩაზე მდებარე ერთ-ერთ კაფესთან მომხდარ ფაქტზე, რა დროსაც გიორგი ქარსელაძემ ცივი იარაღით მძიმე დაზიანებები მიაყენა ახალგაზრდა მამაკაცს და შემთხვევის ადგილიდან მიიმალა. ამ საქმეზე მას პირობითი მსჯავრი დაედო, თუმცა ახლა, კლდიაშვილის ქუჩაზე არასრულწლოვნის დაჭრის შემდეგ მის მიმართ პირობითი სასჯელი შესაძლოა, რეალურ პატიმრობად შეიცვალოს, რასაც სავარაუდოდ, შეუტყობინებლობის მუხლით გათვალისწინებული სასჯელის ზომაც დაემატება.
ის, რომ გიორგი ქარსელაძე 1-ელ დეკემბერს კლდიაშვილის ქუჩაზე არასრულწლოვნის დაჭრაში ბრალდებულ მის მეგობართან, ბენო ჩიკვაიძესთან ერთად იმყოფებოდა, დაჭრილი ბავშვის დედის ჩვენებაც ადასტურებს, თუმცა სანამ მის ჩენებას გაგაცნობთ, ვნახოთ დადგენილება ბრალდების შესახებ:
„2020 წლის 01 დეკემბერს ქ.თბილისში, კლდიაშვილის ქუჩა N15-ში მდებარე საცხოვრებელი სახლის ეზოში გიორგი ქარსელაძე იმყოფებოდა ბენო ჩიკვაიძესთან და გამოძიებით ამ ეტაპზე დაუდგენელ პირთან ერთად. აღნიშნულ მისამართზე, დაახლოებით 19:00 საათზე ბენო ჩიკვაიძემ ცეცხლსასროლი იარაღიდან გასროლით არასრულწლოვან კ.ჩ-ს ორივე მუხლის არეში მიაყენა ნაკლებად მძიმე – ცეცხლნასროლი დაზიანებები. ბენო ჩიკვაიძე და გიორგი ქარსელაძე დაუდგენელ პირთან ერთად მიიმალნენ შემთხვევის ადგილიდან. გიორგი ქარსელაძემ, რომელმაც ნამდვილად იცოდა, რომ ბენო ჩიკვაიძის მიერ ჩადენილი იყო მძიმე დანაშაული, არ შეატყობინა სამართალდამცავ ორგანოებს“.
გამოძიებით და მოწმეთა ჩვენებებით ირკვევა, რომ არასრულწლოვნის დაჭრას წინ უძღოდა ზემოხსენებული პირების მხრიდან სიტყვიერი და ფიზიკური დაპირისპირება კლდიაშვილის ქუჩაზე. ამ ადგილას ისინი ქალისა და მამაკაცის ჩხუბს შეესწრნენ. ქალი ყვება, რომ მისმა ახლობელმა, ვინმე კ.ფ-მ აგურებით დაამტვრია სახლის ფანჯრები, სადაც არასრულწლოვანი ბავშვებიც ცხოვრობენ, რის გამოც ის მამაკაცს დაუპირისპირდა და მისი აგრესიის მოგერიება პოლის ჯოხით სცადა. სწორედ ამ კონფლიქტში ჩაერთო ბენო ჩიკვაიძე და მისი თანხმლები პირები. არასრულწლოვნის დედის ჩვენებით, ჩიკვაიძემ იარაღი ამოიღო და მის 16 წლის შვილს, რომელიც ჩხუბში ჩართულ პირების გაშველებას ცდილობდა, მუხლებში ესროლა. გასროლის შემდეგ კი ბენო ჩიკვაიძემ გიორგი ქარსელაძესთან და კიდევ ერთ პირთან ერთად შემთხვევის ადგილი დატოვა და მიიმალა.
„ჩემს წინ მდგომი სამი ბიჭიდან ერთ-ერთმა, რომელსაც ეცვა მუქი ფერის წელამდე ქურთუკი, მუქი ფერის ჯინსი, რომლის ჯიბიდან დაკიდებული ჰქონდა ბენდენა შავი თეთრში თავის ჩონჩხის გამოსახულებით, ეხურა შავი ფერის ქუდი. მან ჯინსის შარვლის წინა საქამრედან ამოიღო ვერცხლისფერი პისტოლეტი და სამჯერ გაისროლა ჩემი შვილის მიმართულებით, გასროლისას ჩემი შვილი მყისიერად წაიქცა და მივხვდი, რომ ის დაიჭრა, წავედი ინსტიქტურად მისკენ. ვნახე, რომ მარჯვენა და მარცხენა მუხლის არეში აღენიშნებოდა ჭრილობები, საიდანაც მოდიოდა მცირე რაოდენობით სისხლი. როდესაც დავრწმუნდი, რომ სიცოცხლისათვის სახიფათო ჭრილობა არ ჰქონდა ჩემს შვილს, დავრეკე ადგილობრივ პოლიციაში. ამასობაში ზემოაღნიშნული სამი ბიჭიდან ერთ-ერთი, რომელმაც უშუალოდ ესროლა ჩემს შვილს კ.ბ-ს, სროლიდან მალევე გავიდა ეზოდან არკის გავლით, ხოლო ის ორი პიროვნება მას უკან გაყვა. მე არკისკენ გავყევი ზემოაღნიშნულ ორ პირს, რომლებიც ტოვებდნენ ტერიტორიას. არკაში დავეწიე აღნიშნულ ბიჭებს და დავუწყე ყვირილი, მინდოდა დრო გამეყვანა პოლიციის მოსვლამდე, რომ ისინი შემეჩერებინა. აღნიშნული ორი პიროვნებებიდან, რომელსაც ჰქონდა დიდი ზომის წვერი, ვკითხე – იმ ბიჭს რა ჰქვია, რომელმაც ჩემს შვილს ესროლათქო, რაზეც მან მიპასუხა – რავიცი მეო. ისინი დიდხანს არ გაჩერებულან და მალევე დატოვეს ტერიტორია. ამის შემდეგ მე დავბრუნდი ისევ ეზოში, რათა ყურადღება მიმექცია ჩემი შვილისთვის, რომელიც იყო დაჭრილი. ამასობაში, ეზოში ხმაურზე შეიკრიბნენ მეზობლები, რომლებიც მომეხმარნენ ჩემი ბიჭის ზურგზე წამოწვენაში. გარკვეული პერიოდის მერე მოვიდა სასწრაფო სამედიცინო დახმარება“, – ყვება ჩვენებაში დაჭრილი არასრულწლოვნის დედა.
დაჭრილი არასრულწლოვანი საავადმყოფოში გადაიყვანეს, სადაც მას ოპერაცია ჩაუტარდა. სამართალდამცველებმა დაპირისპირებაში მონაწილე პირები, მათ შორის გიორგი ქარსელაძე [დანაშაულის შეუტყობინებლობის ბრალდებით] დააპატიმრეს. მას სასამართლომ წინასწარი პატიმრობა შეუფარდა.
ცნობისთვის: გიორგი ქარსელაძის ბიძას, დავით ქარსელაძეს კრიმინალურ წრეებში „კალატოზას“ მეტსახელით იცნობენ. ის საქართველოსა და საზღვარგარეთ არაერთხელ არის ნასამართლევი. 2018 წელს „კალატოზას“ სოჭში თავს დაესხნენ და ცეცხლი გაუხსნეს, თუმცა ექიმებმა მისი გადარჩენა მოახერხეს.
