აშშ-ის ქალაქ ნიუ იორკში, ქუინსის ოლქში მდებარე ლონგ აილენდის ებრაული სამედიცინო ცენტრის მედდა, სანდრა ლინდსი ქვეყნის პირველი მოქალაქეა, ვისაც ამერიკული ფარმაცევტული კორპორაცია Pfizer-ისა და გერმანული ბიოტექნოლოგიური კომპანია BioNTech-ის თანამშრომლობით შექმნილი კორონავირუსის საწინააღმდეგო პრეპარატით ვაქცინაცია ჩაუტარდა. წარმოშობით იამაიკელ ლინდსს საკუთარ სამსახურში საინიექციო ხსნარი ორგანიზმში ექიმმა მიშელ ჩესტერმა შეუყვანა, მეორე დოზას კი ის 21 დღეში მიიღებს.
“ამ დღეს დიდი ხნის განმავლობაში ველოდი. საკუთარ გუნდთან ერთად პანდემიის წინა ხაზზე ბრძოლის დროს უამრავი ტკივილი, ტანჯვა და სიკვდილი ვნახე. იმედი მაქვს, ეს კაცობრიობის ისტორიის უმძიმესი პერიოდის დასასრულის დასაწყისია. მსურს, საზოგადოება დავარწმუნო, რომ ვაქცინა უსაფრთხოა. ჩვენ პანდემიის პირობებში გვიწევს ცხოვრება, ამიტომ ამ ყველაფრის დასრულებაში ყველამ თავისი წვლილი უნდა შეიტანოს”, – განაცხადა სანდრა ლინდსიმ.
Pfizer-ისა და BioNTech-ის მიერ გავრცელებული ინფორმაციის თანახმად, რომელიც კლინიკური ტესტირების მესამე ეტაპის საბოლოო შედეგებს ეფუძნება, კოდური სახელწოდების BNT162b2 ვაქცინის ეფექტიანობა 95 პროცენტია. სხეული თავდაცვით უნარს პირველი დოზის მიღებიდან 28 დღეში, განმეორებითი ინიექციიდან კი ერთი კვირის შემდეგ გამოიმუშავებს. პრეპარატი ქმედითუნარიანი გამოდგა, როგორც ახალგაზრდებში, ასევე ხანდაზმულებში. კერძოდ, 65 წელზე უფროსი ასაკის ცდისპირებში, რომლებიც ყველაზე მოწყვლად კატეგორიაში ერთიანდებიან, მისმა ეფექტიანობამ 94 პროცენტი შეადგინა. კვლევის ფარგლებში ვაქცინაციას თავის მსუბუქი ტკივილსა და დაღლილობის გარდა სხვა გვერდითი მოვლენები არ გამოუწვევია.
გადაუდებელ შემთხვევებში ვაქცინის გამოყენების ნებართვის მიღებას აშშ-ის სურსათისა და მედიკამენტების ხარისხის კონტროლის სააგენტოსგან კიდევ ერთი ამერიკული ბიოტექნოლოგიური კორპორაცია Moderna ცდილობს, რომლის პრეპარატის ეფექციანობა 94,5 პროცენტია. ამის გარდა, ახლახან საზოგადოების ყურადღების ცენტრში ოქსფორდის უნივერსიტეტთან არსებული ედვარდ ჯენერის სახელობის ინსტიტუტისა და ბრიტანულ-შვედური ფარმაცევტული კომპანია AstraZeneca-ს მიერ შექმნილი კორონავირუსის საწინააღმდეგო ვაქცინაც მოექცა, რომელიც 90 პროცენტით ეფექტიანია.
popx.ge
