აგვისტოს ომიდან 16 წელი გავიდა. ტრაგიკულ თარიღთან დაკავშრებით სოციალურ ქსელში პოსტს აქვეყნებს თეოლოგი ლაშა დეისაძე-შარვაშიძე.
პოსტს უცვლელად გთავაზობთ:
“1801 წლიდან დღემდე საქართველოს, როგორც ეროვნულ-სახელმწიფოებრივი, ისე საეკლესიო ისტორიის ფურცლები მორწყულია მხოლოდ რუსეთის მიერ უხვად დადენილი ქართული სისხლით. სხვა დამპყრობელი და მტერი საქართველოს ისტორიამ არ იცის მთელი ამ 223 წლის მანძილზე.
2008 წლის აგვისტოს ომი ერთ-ერთი მორიგი სისხლიანი ეტაპი იყო ამ განგრძობით რუსულ ომში საქართველოს წინააღმდეგ.
ჩვენ აუცილებლად დავბრუნდებით აფხაზეთსა და ცხინვალის რეგიონში!” – წერს სოციალურ ქსელში თეოლოგი ლაშა დეისაძე-შარვაშიძე.
2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. დაჭრილ და დაშავებულ სამოქალაქო და სამხედრო პირთა რაოდენობა სულ 2 232-ს შეადგენს, მათ შორის, 1045 პირი სამხედრო მოსამსახურეა.
დღეს, საქართველოს ტერიტორიების 20% კვლავ ოკუპირებულია რუსეთის მიერ. რუსეთის ფედერაცია კვლავაც განაგრძობს საქართველოს რეგიონების – აფხაზეთისა და ცხინვალის რეგიონის ოკუპაციასა და მილიტარიზაციას, რეგულარულად ატარებს უკანონო სამხედრო წვრთნებს ქვეყნის ტერიტორიაზე, ინტენსიურად ამაგრებს საოკუპაციო ხაზს მავთულხლართებით და სხვადასხვა ხელოვნური ბარიერებით, აგრძელებს ადგილობრივი მშვიდობიანი მოსახლეობის უკანონო დაკავებისა და გატაცების პრაქტიკას.
აგვისტოს ომის შემდეგ რუსეთმა საქართველოს ორი რეგიონის – აფხაზეთისა და „სამხრეთ ოსეთის“ დამოუკიდებლობა აღიარა, მაგრამ საერთაშორისო საზოგადოება საქართველოს ტერიტორიული მთლიანობის მხარდამჭერად რჩება.
